Imprentas 119 di Francesco Oggianu
S’inquinamentu unu dannu pro sas generaziones noas
S’inquinamentu est una mineetta chi bi est in tottu sa provintzia de Nugoro e in Sardigna
Dae cando s’Eni si ch’est andada dae Otzana, si est semper faeddadu de bonificare cantu est bistadu inquinadu in annos de industria chimica in cuss’area, chi est prena de velenos e chi podiad essere un’essida pro tanto zovanos disoccupados de sa provintzia de Nugoro. Tottu est abbarradu frimu e sa fabbrica had sighidu a essere unu postu de velenos e disastros e s’Eni si ch’est nadada chenza pagare su daziu. Como si torrad a faeddare de bonificas, ma dae Casteddu e dae Roma sa politica pared chi non cherzad ponner mancu una esina pro torrare a rilanciare cussas areas tra Otzana, Bolotene e Noragugume. Como si est torrande a faeddare de bonifica e su Recovery Found pared chi siad un’occasione prus unicas che rara pro serrare in Sardigna sa partida de sas areas industriales de bonificare, a partire dae Otzana. A lu sustennere est Frantziscu Tolu, cunsizzeri provinciale de s’Anmil, ma pro medas annos operaiu de sa fabbrica de Otzana, cun s’Eni, impinnadu cun su sindacadu e pustis in s’associazione contra a s’amiantu, chi est bistadu muttidu dae pagu dae s’associazione de sos invalidos de su traballu pro faghere parte de sa commissione nazionale amiantu e maladias professionale.
Frantziscu Tolu sullevad un’argumentu chi est de attualidade istrinta bidu chi su cunsizzu regionale s’attera die had esaminadu sos progettos de presentare a su Guvernu. Prugettos chi fintzas a como pagu s’ischidi. In custu silenziu risurtada penalizzada propriu sa chistione ambientale aberta a pustis de s’impinnu pro su riconnoschimentu de sos beneficios a sos eredes e a sos operaios chi risurtana vittimas de sas cundiziones de traballu de s’istabilimentu chimicu. Comente ammentad Frantziscu Tolu, sunu medas annos chi bi est s’impinnu de sos opeeraios paris cun s’Aiea e sa Cgil in d’una vertenzia subra de s’esposizione a s’amiantu e sas maladias professionales chi had registradu cun s’Inalil importantes passos adaianti cun su ri connoschimentu, fintzas pro vias amministrativas non solu zudissiarias, subra de sos dirittos negados. mancari s’Enichem, chi ch’est bistada trazzada in tribunale, pared disponibile fintzas a trattare subra de sos risarcimentos de sa zente chi est morta, ancora non si registrana novidade de sustanzia subra de su problema ambientale.
Si deved connoschere chi Otzana, comente tantas atteras zonas industriales sardas cumprumittidas, comente narad Frantziscu Tolu, est bistada bogada dae s’aia dae sos interventos mannos de bonifica ligados a su ricconnoschimentu de situ de interesse nazionale chi, pro atteru, aiada custrettu chi had inquinadu a finanziare sos interventos de pulizia e pulire cantu est bistadu imbruttadu. In su matessi tempus pagu s’ischid subra de s’istadu beru de sas cosas, fintzas pro cantu riguardada s’inquinamentu de sos terrinos e de sas faldas, mancari bi sian bistadas inchiestas zudissiarias e autorevoles interventos fintzas in sede politica. Eppuru est craru a tottus chi chenza una bonifica bera e documentada sde su situ industriale de sa sardigna centrale, cun inbestimentos chi tiana cunsentire tra atteras cosas de faghere postos de traballu pro sas levas noas e pro chentinaias de giovanos, est impossibile faeddare de unu rilanciu economicu de s’area.
Chenza una certificazione ambientale chi ne pothad garantire sa salude de s’area, non had a essere possibile faghere decollare cussos progettos ligados a s’agrualiemntare e a sa sustenibilidade ambientale, chi sunu sos unicos in gradu pro garantire unu futuru de custas zonas de inintro de sa Sardigna devastadas dae sa crisi industriale de custos urtimos 15 annos, chi had lassadu un’eredidade fintzas unu campusantu e velenos. Bidu fintzas sas delusiones de su tempus passadu, fintzas a livellu regionale, a custu puntu solu sos progettos de su recovery fund podene ammuntare s’isforzu finanziariu pro faghere una operazione manna de bonifica. Pro cussu sas associaziones chi sunu in campu pro chircare de dare unu sensu a sos isforzos fintzas a como fattos, benini inivitados sos sindigos de s’area industriale, in modu mannu sos de sos comunes de Otzana, Bolotene, Noragugugume, Orane, Sarule e Oroteddi a si mobilitare isssos paris cun sas popolaziones pro faghere de tottu chi custa occasione de garantire s’isviluppu beru de sa sardigna centrale e non soli, non benzad perdida e chi sos progettos benzana inseridos tra sas prioridades dae parte de su cunsizzu regionale.
Fintzas a carchi annu faghed si nariad chi sa Sardigna fid prusu inquinada de sa Campania e sa zona de Otzana fid una de sas peus. a differenzia de sa Campania sa Sardigna had sacrificadu chentu ettaros de territoriu in prusu pro idrocarburos, metallos pesantes e tottu cantu chi faghed male a s’ambiente. est cantu nd’essid de inquietante dae sa sala de sos cunvegnos de s’Isre, in d’una riunione chi fid bistada organizzada dae s’ordine de sos duttores de Nugoro in su 2013. A denunziare custu tristu primadu est bistadu Pissente Migaleddu, chi si ch’est mortu dae carchi annu. Su radiologo tataresu si fid frimadu solu a sa provintzia de Nugoro, ma tando haiad ispiegadu chi sas areas mannas inquinadas de sa Sardigna individuadas cun s’istudiu de s’istituto superiores a sa sanidade,bi fid cussa de Portu Turras e cussa de su Sulcis, chi bi sunu prus de 40 comunes cun prus de 400 mizza abitantes, nande chi unu sardu subra e trese vived in sitos inquinados. Custu chenza cunsiderare sas areas de Otzana, Tossilo (in Macumere), sa Maddalena o Teulada e pustis fintzas Quirra.
In su cunvegnu de su 2013, chi est semper de attualidade, sos datos de mortalidade de Tatari e Portu Turras sunu preoccupantes, in su Sulcis bi est una incidenzia manna de maladias respiratorias. Si poded isperare ancora chi sas cosas pothana mudare, ca s’interessamentu de sa popolaziones contra a s’inquinamentu est aumentande e so zovanos bi cheren biere craru. Pro cussu dae tando est creschidu su fronte de su no, contra a su carbone e cantu est sa causa de s’inquinamentu, comente sos rios, sos velenos e rifiutos sun cuados in tottue. dae carchi annu est bistada aumentada s’informazione. S’ischidi chi inube bi sunu funtanas de inquinamentu mannu, benid influenzadu cussu chi li narana su fenotipo, chi enid programmadu non in manera curretta. Cussu chi nd’essid est chi sos effettos si biene a pustis de 30 annos. Pared chi siad semper prus mannu s’aumentu de sas patologias cornicas e degenerativas, chi sunu infiammadores tumorales de sos urtimos 50 annos. Sosm duttores nugoresos narana chi si si ridued s’esposizione a sas sustanzias inquinantes, sos beneficios arrivana de siguru.
Pro cantu si poded narrere de s’impiantu de sos rifiutos de Macumere, chi s’est faghinde nou cun d’una ispesa de prus de 50 miliones accurzu a s’atteru impiantu ezzu de Tossilo, sa distanzia dae Borore est de 1450 metros e 3770 dae Biroro. Accurzu bi est su frumene Murtazzolu chi est alimentadu dae medas affluentes, comente su riu Tossilo chi, accurzu a su nuraghe Urighe, rezzid sas abbas de su riu S’adde, chi est longu pagu prus de 10 chilometros chi est peroe pagu isviluppadu, ma est alimentadu dae sas medas sorgentes de Mularza, chi faghed creschere su riu Murtazzolu, fintzas in s’istiu. Fintzas sa discarriga de Monte Muradu est ininde unu siti individuadu comente de interesse comunitarioi de sa Campeda. Su situ non rientrad tra cussos individuados comente fattores escludentes de sos criterios istabilidos dae sa Regione pro s’individuazione de sas areas non idoneas a sa localizzazione de impiantos de gestione de sos rifiutos e s’attividade est fintzas cunforme a cantu prevedidi su Puc de su Comune de Macumere.
Si poded narrere chi in provintzia de Nugororo, in sos sitos chi sun bistados industriales, comente cussu tra Otzana, Bolotene e Noragugume, pustis in Macumere cun Tossilo e Bonu Trau e fintzas in Siniscola, sun tottus inquinados e mancari sian bistados fattos cunvegnos chi est bistadu certificadu s’inquinamentu e mancari siad bistadu accertadu chi bi sunu sustanzias inquinantes chi faghene male a sa salude de sas personas, non bi est ancora unu progettu de risanamentu. Anzis, pro evitare chi cantu est bistadu fattu in sos urtimos 50 annos si torred a faghere, nudda si est faghinde pro faghere impiantos modernos chi diana traballu e pothana mantennere sos giovanos in custos territorios, ma si insistid a faghere ancora cosas isbagliadas, comente s’inceeneridore nou de Tossilo, chi deve traballare 60 mizza tonneladas de rifiutos onzi annu.