Imprentas 173  di Ivan Marongiu

Renato Raccis, su primu cannoneri sardu de sa Sèria A

Cando si pensat a sa Sardigna e a su fùbbalu s’immàgine est semper cussa de Gigi Riva. In pagos s’ammentant però de Renato Raccis, forsis su primu bomber sardu de su fùbbalu italianu. Nàschidu in Mandas su 17 de mese de làmpadas de su 1922, Raccis si faghet notare giai dae minore pro s’abilidade sua in su giogu. S’est formadu in su tzìrculu amatoriale de San Saturnino, e posca s’est trasferidu in su Dopolavoro San Giorgio, tzìrculu chi sebit a formare sos giogadores pro su Casteddu, chi in cussos però annos est in dificultades econòmicas mannas. Ma Raccis no at a giogare mai cun su Casteddu in una partida ufitziale. Nche l’acabbat in Toscana pro giogare in sa Fiorentina, ma posca arribbat s’oferta de su Prato, chi bisat sa Sèrie B. Sa prima istajone de Raccis in biancu-asulu est cussa datada 1939-1940 e su Prato, chi giogat in su Girone E de sa Sèrie C, s’imponet deretu comente una de sas iscuadras prus interessantes e fortes de s’agrupamentu suo. Su protagonista at èssere  Renato Raccis, chi  a pustis de àere superadu sa crisi pro su càmbiu de tzitade, at a ripagare s’iscuadra pro sa fidùtzia.

Ma s’isblocat solu a sa sesta giorronada, su 29 de santugaine, marchende una tripleta a su Grosseto, bìnchidu pro 9-1 dae su Prato ghiadu in banchita dae Mario Gianni. A pustis de èssere istadu semper  a presu de sas primas positziones, su Prato però si lassat andare in su finale de campionadu, permitende a su Spezia de lu superare. Sos biancu-asulos cùngiant cun unu deludente 4° postu. No otenent sa promotzione, ma su tìtulu de mègius atacu de su girone: 70 sunt sas retes marcadas in 28 partidas, e 27 (in 25 presèntzias) sunt de su bomber sardu. Comente si siat, bidos sos presupostos, sa chistione de sa promotzione paret èssere solu rimandada. Difatis, in su campionadu 1940-1941 su Prato, cun s’allenadore nou Armende Bonino, conchistat sa sèrie B.

Lu faghet gràtzias a un’assentu tàticu nou, cun un’atacu chi permitet de marcare 60  retes totales,  e cun una difesa capatza de subire in 15 retes ebbia. Su datu est galu prus interessante si si cunsìderat chi 7 de custas retes arribbant in s’ùrtima gara, cando sos pratesos fiant giai cun sa conca a sos isparègios bàlidos pro sa promotzione e subint sa vindita de su Grosseto, chi un’annu prima fiat istadu iscunfitu gràtzias a sos primos gol de Raccis. Pròpiu issu, in su girone finale bàlidu pro sa promotzione in Sèrie B, marcat 3 retes in 6 garas, batende su puntègiu istajonale suo a sa tzifra ispantosa de 34 retes in 33 garas. Fiat nàschidu un’isteddu. In Sèrie B sas cosas, pro su Prato, però no andant comente si diat chèrrere: otenta sa Sèrie B a pustis de deghe annos, sos biancu-asulos la perdent deretu.

Renato Raccis ebbia, sempre prus famadu e tìmidu dae sos aversàrios, non bastat a sarvare un’iscuadra fràgile chi in trasferta non chessit mai a s’impònnere e chi pro custu, penùltima in classìfica, ruet in sa categoria minore. Ùnica satisfatzione de un’annada malassortada (su Prato at torradu a bìere sa Sèrie B s’ùrtima bia in su 1963) est s’afermatzione definitiva de “la saetta di Mandas”, comente lu mutiant sos giornales, chi mancari un’istajone difìtzile faghet 10 retzes prima de lassare sa màllia biancu-biaita. Pro sa Sèrie C unu bomber che a issu, chi a mancu 23 annos marcat 71 retzes in 84 garas in su cursu de tres istajones, difatis est unu lussu tropu mannu. Galu oe Renato Raccis est su mègius marcadore in s’istòria de su Prato, fintzas si dae s’ùrtima gara sua (Pisa-Pradu 6 a 0, 12 de trìulas de su 1942) sunt colados prus de setanta annos.

Su tzentravanti mandaresu non solu lassat sa Sèrie C, ma lompet deretamente in Sèrie A, semper in Toscana. Arribbat difatis in su Livorno chi in s’istajone pretzedente s’est sarvadu pro unu puntu ebbia dae sa retrotzessione. Sos toscanos ant detzìdidu de torrare a partire dae Raccis e dae su tècnicu nou Ivo Fiorentini, bogadu dae s’Inter: cussu de su 1942/1943 at a èssere unu campionadu istòricu pro s’iscuadra livornesa, chi pro paritzas chidas at a ghiare sas primas positziones de su torneu, ma chi a s’agabbu s’at a arrèndere a su chi at a diventare “su Grande Torinu”. Su Livorno si piegat pròpiu a s’ùrtimu, ponende però in mustra unu giogu galanu e istravanadu, acanta faghent bella figura sos gol de Pianelli e, apuntu, de Renato Raccis, autore de 11 gol in s’esòrdiu in màssima divisione. Chissai ite diant àere pòdidu cumbinare, sos toscanos, si l’istajone imbeniente no esseret  sa gherra a firmare sos giogos.

In cussos chi ant a passare a s’istòria comente  sos “campionados de gherra”, Renato Raccis si distinghet in sas filas de s’Asti, iscuadra modesta bogada belle in deretura dae su torneu, acanta però su bomber sardu aiat acudidu a marcare 4 retzes in 11 partidas. Posca at a bestire fintzas sa màllia de sa Juventus, ma cussa de sa segunda iscuadra, su Dopolavoro Lantza, mancari si pro medas espertos s’apuntamentu in biancu-nieddu est rimandadu a sa fine de sa gherra. A s’acabbu de su cunflitu mundiale ogni giogadore depet torrare in s’iscuadra chi nde deteniat sos diritos prima de sas bombas: Raccis torrat a Livorno, acanta agatat su cumpàngiu de atacu Pianelli e s’allenadore Fiorentini. Su campionadu 1945-1946 benit giogadu cun sas iscuadras divisas in duos agrupamentos, unu de su Nord Itàlia e unu de su Tzentru-Sud, pro limitare sos iscostiamentos e sos gastos: su Livorno passat su girone suo, ma in sa fase finale benit fatu a sale dae sas iscuadras de su Nord.

Est torra su Torinu a s’impònnere, sighidu dae Juventus e Milan, e s’istòria si repìtet fintzas in s’istajone imbeniente, cando si torrat a su girone ùnicu: su Livorno, oramai no est prus s’iscuadra rivelaztione e arribat a su 15° postu, cun delusione manna de sos tifosos suos, chi però si podent gosare sas giogadas bellas de Raccis, autore fintzas in un’istajone non pròpiu fàtzile, de 17 marcaduras chi atirant s’interessu de sos club mannos de su Nord. Lu cherent Juventus e Milan: ambas duas bident in su bomber de Mandas unu rinfortzu detzisivu pro bìnchere un’Iscudetu. A sa fine benit comporadu dae su Milan, cun su presidente Trabattoni chi intregat a s’allenadore Bigogno cussu atacante sardu de cale nde allegant in totu Itàlia. Cussu pitzocu bennidu dae una biddighedda de su tzentru de sa Sardigna at a chessire a dare a sos ruju-nieddos un’Iscudetu chi mancat oramai dae baranta annos?

A dolu mannu s’istòria, su destinu, ant detzìdidu in manera diversa. Arribbadu in s’istiu de su 1947, Renato nche ponet pagu a s’adatare a sa vida de una tzitade manna comente  Milanu. Prus difìtzile resurtat s’adatamentu suo in su campu, essende chi su club nou li pretendet unu sacrifìtziu prus mannu, bida  sa presèntzia in su repartu chi ofensivu de  Carapellese e de su bomber uruguaianu Hèctor Puricelli. Raccis at lòmpidu 26 annos, est in su prenu de sa maturidade e a pustis de pagu chessit a ammustrare totu sas calidades suas: lestresa, resolutesa, coràgiu, unu tiru potente chi li faghet marcare 8 retes, e unu dribbling ispantosu, chi forsis ponet in mustra  fintzas tropu, chi però li faghet balangiare s’ammiratzione de su pùblicu de San Siro cando andat bene, e sos irrocos de mister Bigogno cando perdet sa bòcia. Cara a sa fine de su torneu, però, sa forma de su giogadore cumintzat a pegiorare: Raccis parit semper prus istracu e fadigadu, pròpiu cando su CT Vittorio Pozzo at cumintzadu a l’osservare cun s’idea de lu cunvocare in natzionale. Su 28 de martzu de su 1948 su Milan giogat in domo contra sa Triestina de Nereo Rocco e otenet solu unu parègiu deludente pro 1 a 1: Raccis non lassat su sinnu, si  nche papat unu gol fàtzile fàtzile, e benit cuntestadu dae sos tifosos bidu chi giai in su turnu pretzedente un’errore suo dae su dischetu est costadu a su Milan s’iscunfita contra  su Bologna. In sos ispogliatoios però essit a campu sa beridade: “la saetta di Mandas” fiat isdebilitadu dae sa tubercolosi. Renato Raccis, 27 annos galu de acumprire, est custrintu a si retirare. Torrat a Casteddu e benit luego ismentigadu. S’iscena isportiva de cussos annos est totu pro su Grande Torino e posca at a arribbare s’iscudetu de su Casteddu ghiadu dae “Rombo di Tuono”. Cando morit, a 57 annos, in su 1979, Renato Raccis no est unu nùmene chi benit ammentadu dae medas: epuru faghet a nàrrere chi siat istadu su primu beru cannoneri sardu de sa Sèrie A.