Imprentas 176 di Francesco Oggianu

Sa irgonza de sa sanidade in sas zonas de mesu de sa Sardigna

“De contare innoghe bi diad essere meda”. Custu lu narad unu duttore de su distrettu sanitariu de Macumere. Non narad atteru peroe. Nissunu faeddad de su personale de su distrettu sanitariu de Macumere chi, comente cussu de Sorgono e cussu de Nugoro est in condissiones feas. Tottus nde faeddana, tottus si lamentana, ma chie ischid sighid a bistare a sa muda. Unu clima de terrore in custos ispidales e presidios sanitarios, ca de su personale, chie faeddad cun sos istranzos beni luego licenziadu. Tottus ischini, tottus deven serrare sos ogros dainanti a tantu distratu chi sa sanidade sarda est faghinde in custu territoriu. E non faeddana mancu sos dirigentes provintzales. Dae una parte duttores e infermieris timene de essere licenziados, dae s’attera bi est sa politica chi sighid a faghere finta de nudda. Ma sa situazione est veramente male posta e sun guaios pro chi ista male e si deved curare. Una visita comente unu elettrocardiogramma, pro chi istad male, chi suffrid de diabete, toccad de isettare chissai cantu. In Macumere toccada de isettare fintzas un annu, si tottu andad bene. Ma pro sos dirigentes tottu andad bene, tottu est a postu. Una irgonza.

Sos giornales e sas radios locales, comente Radio Macomer Centrale, nde faeddana onzi die. Sa zente si indignad, sos sindigos minettana temporales, ma tottu addurad frimu e sighid e pejorare. Onzi die b’ha carchi cosa e narrere: a Bortas a Nugoro, a Bortas in Siniscola, a Bortas in Macumere e a bortas in Sorgono, ma non deppimus ismentigare cussu chi est suzzedinde in Ghilarzi e Bosa, duos ispidales minores chi fintzas a carchi annu faghene fini su puntu de riferimentu de tottu su circondariu e beniana dae tottue pro si ricoverare, pro essere cuurados e pro essere operados. Como custo ispdales sun serrande, cun detzisiones istranas, leadas dae Roma e dae sa politica, in nomene de unu risparmiu de s’Istadu, chi ch’est semper prusu attesu dae sa Sardigna nostra, dae sas biddas nostras. Si si serrad unu’ispidale, si si serrada unu serviziu sanitariu importante, pared chi non suzzedad nudda. Sa zente est custrinta andare a foras pro si faghere curare, oppuru andare dae unu istruttura privada e pagare. Chenza rimborsu. E sa politica ite faghed? Si cagliada a sa muda e non chered chi nissunu di pothad lamnetare. Ca tantu non suzzedid nudda.

Dae pagu s’Unione sarda had fattu un’inchiesta visitande su presidiu sanitariu de Macumere, inube dae carchi annu si assistid a unu smantellamentu de sos servizios e repartos chi fini bene conntos in tottu sa Sardigna. Faeddamos de su laboratoriu Analisi, inube sa sanidade pubblica had ispesu meda inari pro comporare macchinarios costos, pro podere suddisfare sas esigenzas de unu territoriu meda mannu. Pariad chi tottu essere andande bene, pustis unu paatologo si ch’est andadu in pinsione e gai e tottu had fattu unu duttore, chi pro medas annos fid responsabile de cussu laboratoriu. Itye had fattu sa Ats? ne patologo e mancu su duttore est bistadu sostituidu e como sa Assl de Nugoro had detzisu de faghere sas analis a Nugoro, lassande a Macumere in manos de carchi infermieri solu pro faghere sos prelievos. E sos macchinarios chi fin bistados comporados? Tottus sunu amnuntados cun lentolos e cantu atteru. ussos macchinario non sunu bistados mai azzesos e mancari calincunu eppad nadu chi su laboratoriu de Macumere beniad rilanciadu, nudda est suzzedinde. E comente tottus sos atteros presidios sanitario de sas zona de mesu de sa Sardigna, si assistid a unu ismtantellamentu, chi lassad custos logos chenza prospettivas.

Su sistema sanitariu regionale in periferia non est duncas una garanzia. In cussu chi fid su laboratoriu analis de Macumere in un’istanzia, unube bi est abbarradu su cartellu inube bi est iscrittu Microscopio, bi est abbarradu unu macchinariu chi sos tecnicos lu muttini Immunoenzimatica, chi deviad servire pro faghere sos test subra de sa tiroide e issuprire sos marcadores tumorales e de s’epatite. Unu macchinariu chi est perfettamente funzionante, ma est bloccada da medas meses. In s’istanzia chi est accurzu, inube bi est iscrittu Urine, sos istrumentos che sunu semper mortos. In su salone chi est prus mannu, tra chentinaias de provettas, bi est su tritticu de s’iscandalu: su contaglobulos chi nissunu usad, s’apparecchiu pro sa chimica clinica e cussu pro su dosaggiu de sas coaugulaziones sunu frimos cussos puru. Tottu frimu pruite sas analisi a Macumere non si podene faghere prusu, pro una idea macca de accentrare tottu in sos ispidales mannos. Sos prelievos e bastada. Fintzas in sas biddas de sa zona. Su sambene prelevadu poi ch’enid leadu a Nugoro, inube benin fattas sas analisi pro nde essere torra ispdedidas a Macumere.

In Macumere, comente in atteros presidios sanitarios e ispidales minores sunu abbarrados pagos servizios. Mancana sos is<pecialistas e mancad cantu deved serbire pro garantire sa sanidade in tottu su territoriu. B’had bisonzu in tottu sa zona. In Macumere in su segundu pianubi sunu sos ambulatorios ispecialisticos: corridoios e istanzias noas e infermieris chi andana e benini. Mancana sos duttores comente in tottus sos repartos: in Radiologia, in Diabteologia e fintzas in sa dialisi. Bi fid sa riabilitazione, considerada una de sas menzus in Sardigna. Si deviad potenziare ancora e su sonnu de idere potenziadu cussu reparti est amuntadu dae su pruere. Pro como sos postos sunu solu noe, ma deviana diventare trinta. Sos atteros 21 fin bistados fattos, ma su repartu non est mai istadu utilizzadu. Bi sunu sas istanzias, ma mancana sos lettos e mancada su personale, comente sos duttores. sa matessi cosa si podene narrere pro su repartu de oncologia, chi had funzionadu semper bene. Nudda s’ischidi ite si chered faghere cando si c’andad unu duttore chi b’est dae medas annos. E duttores a disposizione sun pagos.

E pro abarrare in Macumere, bi est su problema de sos duttores de base. Trese sunu andados in pinsione e non si agata zente pro podere garantire custu serviziu essenziale. Su bandu, ancora una orta, roso s’assegnazione de sos incarrigos provvisorios de assistenzia primaria pro su comune de Macumere est andadu desertu. Duncas a sa Assl non est abbarradu atteru de faghere che currere a sos riparos, istudiande un’atteru pianu. Sos duttores de base chi tenene unu numeru massimu de 1500 pazientes nde podene leare in carrigu 300 in prusu. Unu provvedimentu chi had a tennere una durada massima de ses meses. S’isperanzia est chi cando iscadini custos termines, si pothad faghere sa nomina de su titolare. Sa chistione est meda delicada. Si nde faeddad dae meda tempus e , bidu chi non b’had duttores, pared chi siad destinada a essere unu argumentu chi uddid a tottus fintzas de preoccupazione. Dae su primu de maju si ch’est andadu in pinsione Marco Mura a pustis de 43v annos de serviziu. Had lassadu ambulatoriu e pazientes comente duos mese primu had fattu Pietro Del Rio e un’annu primu Rino Demontis. Unu disastru.

Sos disagios sunu medas, mancari bi siad carchi duttore giovanu chi chered essere postu in Macumere, comente sa dottoressa Laura Foddai, ma fintzas custa faghed solu pro como otto meses e pustis si che deved andare. Non si agatan duttores e cusso pagos chi bi sunu sunu impinnados cun s’emergenzia sanitaria e cun sas vaccinaziones. Pro su sindigu de Macumere Antoni Succu, oe comente che mai, si est vivinde sos effettos de numeru serradu in sas universidades inube si formana sos duttores noso. Pro cambiare cussu bi servidi una riforma a livellu ministeriale, ma in Roma pared chi siana pensande a atteras cosas e non a sos problema beros de sa sanidade. Sos pagos giovanos chi resessini a bintrare in sa facultade de meighina, chircana in atteros logos sa sistemazione. a Chie diventad dentista, a chi chiorrad atteras ispecializzaziones e nissunu chered andare a traballare in sa sanidade pubblica, bidu sos dannos chi sunu suzzedinde.

Ite si chered faghere? Sos sindigos de su Marghine minettana temporales, a calincunu chered faghere sa marcia a Casteddu, pro faghere movere sa Regione, siad pro sos duttores chi mancana, siad pro sos servizios chi non benini garantidos e fintzas pro chircare da sarbare cussu chi li narana s’ispidaleddu, inube bi est su poliambulatoriu de su presidiu sanitariu de su Marghine. A custu burdellu chi est suzzedinde, cun sa zente chi est dispierada e non ischiid ite faghere, sa Assl de Nugoro non resessidi a rispondere a sas dimandas chi sunu faghinde sos sindigos, chi non resessini prusu a controllare sas protestas chi arrivana dae sa zente. Sa cosa peus est chi manu manu chi si andadad adainanti, sas cosas diventana semper pesu e chenza peruna preoccupazione de chi est sezzidu in sa Regione e de cussos chi tenene in manos sa sanidade sarda.