Imprentas 178 del 25.05.2021 di Ivan Marongiu

Ite b’at a palas de sa gosi mutida “economia birde”. Sas minas de cobaltu in Congo

Su 70% de su minerale impreadu pro sas baterias de sas màchinas ecològicas e de sos telèfonos benit dae  sas minas de sa Repùblica Democràtica de su Congo, acanta  sa bogadura de custu materiale costat meda prus pagu, pro ite sa manodòpera impreada est suta-pagada e sos deretos de sos traballadores no esistint.

In sa prima metade de su sèculu XIX Charles Goodyear at imbentadu su protzessu de vulcanizatzione. Custu protzessu cumentzat dae una matèria prima naturale, su cautzù. Una bia bogadu dae sas matas custu produtu beniat portadu a temperaduras artas artas. Posca, a pustis de vàrios protzessos de traballadura e  cun un’agiunta de sùrfuru, s’oteniat una matèria elàstica ma cumpata, capatza de cambiare forma a segunda de sas solletzitatziones e de sos isfortzos chi subiat, pro torrare posca a sa forma originària sua.

In sos primos annos de su Noighentos re Leopoldo II de su Bèlgiu deteniat su monopòliu de su cautzù, essende chi si fiat impossessadu belle de su totu de su territòriu mannu  de su batzinu idrogràficu de su riu Congo, acanta s’agatat sa  foresta pluviale prus manna de su mundu, fatu fatu a cussa amazònica. Pro satisfàghere s’aumentu continu de sa dimanda europea de cautzù, sos òmines de su soberanu belga, ant impreadu ogna mezu, patzìficu e violentu. Su problema prus mannu fiant sos indigenos chi biviant in cussos logos, chi fintzas si non cumprendiant su valore de su cautzù, non cheriant chi sos padentes acanta biviant dae sèculos èsserent isfrutados in manera industriale, atoschende e luende sas terras e sas abbas. S’àteru problema fiat su de sa manodòpera, essende chi perunu operaju belga diat àere traballadu in cussos logos ispèrdidos de su mundu, a cussas cunditziones, e cun unu clima pagu ospitale. Pro custu sos belgas no ant adduradu a reduire sos indìgenos in iscravidade: secuestraiant  sos pipios pro costrìnghere sos òmines a respetare sa cunsigna de sas cantidades netzessàrias e, pro los ameletzare  ant finidu pro segare manos e pees a sos pipios o fintzas a istragare sos abitantes de sos bidditzolos chi non chessiant a frunire bastante làtitze. Su resurtadu sunt istados mìgia de mortos e de mutilatziones, finas a cando unu grupu de giornalistas e diplomàticos ant denuntziadu su chi fiat sutzedende, est a nàrrere unu beru unu genotzìdiu. Unu genotzìdiu chi aiat abertu un’era noa, una rivolutzione determinante pro s’indùstria europea chi pro prodùere sos produtos suos aiat cumentzadu a isfrutare sas risursas materiales e umanas de s’Àfrica.

Oe est capitende sa matessi cosa. Pro su mundu est belle arribadu su momentu de colare dae s’economia de sos fòssiles — carbone, petròliu, gas — a s’economia birde, in inglesu sa green economy, est a nàrrere unu sistema fundadu subra sas energias rennoaditzas o in s’eletritzidade. Su cambiamentu, chi est suta sos ogros de totus est  cussu de s’alimentatzione elètrica de sas màchinas, a sas cales sunt traballende totu sas impresas mannas de su setore. Pro esempru sa Volkswagen puntat a bèndere tres milliones de màchinas elètricas intro su 2025. Sa Volvo at comunicadu chi dae su 2019 at a acabbare de prodùere màchinas alimentadas petzi a benzina o nafta. Sos guvernos de Bretagna Manna e Frantza ant assùmidu s’impinnu de  bandire sa bèndida de veìculos cun motores a combustione dae su 2040. Fintzas sas cumpangias petrolìferas si nde sunt abigiadas chi sas màchinas elètricas ant a causare un’acabbu priu ma progressivu de sa dimanda de s’oro nieddu.

Si si contat chi pro realizare sa bateria de una màchina elètrica serbint dae sos 4 a sos 14 chilos de cobaltu (presente fintzas in sas baterias de telèfonos, tauleddas e elaboradores eletrònicos), si cumprendet pro ite su prètziu de custu minerale in sos ùrtimos duos annos siat aumentadu gosi meda, arribbende a costare in su London Metal Exchange prus de 80.000 dollaros a tonnellada.

A bi balangiare sunt sas impresas mundiales mannas. Sa multinatzionale Glencore est s’estratore printzipale de cobaltu de su mundu e controllat belle 1/3 de sas forniduras  globales de custu materiale. Segundu sos analistas, ogna bia chi su prètziu de su materiale aumentat de unu dollaru ebbia, sa sotziedade anglosvizera balàngiat prus a mancu 55 milliones de dollaros in prus. Fatu fatu a sa Glencore bi sunt fintzas àteras impresas  de totu su mundu chi sunt interessadas a s’isfrutamentu e a su cummèrtziu de su  cobaltu: sa Panasonic, sotziedade giaponesa chi faghet baterias, s’americana Tesla, s’isvedesa Northvolt, sa tedesca Daimler, sa canadesa First Cobalt, s’australiana Pilbara Minerals, e fintzas Rosatom, s’azienda russa pro s’energia nucleare. Est craru chi a palas de ognunu de custos cartellos bi sunt sas economias natzionales. Sa Tzina est su Paisu prus ativu e postu mègius e s’at giai asseguradu sa fornidura de mìgias de tonnelladas de su metallu istratègicu pro prodùere baterias. Sa tzinesa Gem, sotziedade chi s’òcupat de rafinatzione, chi tra sos clientes suos at aziendas produtoras de baterias e automòbiles de totu su mundu, at firmadu un’acòrdiu cun sa Glencore pro otènnere una frunidura triennale de cobaltu de 52.800 tonnelladas: semus alleghende de prus de su 50% de totu su materiale chi est istadu bogadu in su 2017 in totu su pianeta.

Est normale chi  sa Tzina apat interessu a egemonizare su mercadu de custu materiale, essende chi est divenida in pagos annos su primu mercadu mundiale pro sa bèndida de autoveìculos e fintzas su primu pro sa bèndida de màchinas elètricas, superende su millione de veturas. Sa punna de su guvernu tzinesu est ambitziosa: lòmpere a  chimbe milliones de veturas elètricas bèndidas intro su 2020.

Pro lòmpere a custu obietivu serbit una cantidade esagerada a beru de cobaltu e sa  riserva mundiale prus manna de custu metallu est in sa Repùblica Democràtica de su Congo, sa matessi regione chi fruniat su cautzù a Leopoldo II de su Bèlgiu. Mancari  riservas mannas de cobaltu s’agatent fintzas in Tzina, Zàmbia, Rùssia e Austràlia, su 70% de su materiale impreadu in su mundu oe benit dae s’istadu tzentru-africanu, e su motivu est simpre: su cobaltu congolesu est su prus baratu, pro ite sos costos de produtzione sunt bassos meda.

In Congo no esistent minas organizadas, su metallu benit bogadu dae deghinas de sitos ocasionales chi s’agatant mescamente in sa regione de su Katanga, acanta si pensat chi a su mancu 100.000 persones regollant a manu e cun trastos de ocasione, e sena peruna norma de seguresa, su metallu pretziosu chi faghet funtzionare sos telefoneddos nostros e sas màchinas elètricas de s’Economia Birde.

Tra custos minadores artesanales bi sunt medas  pipios, fintzas de sete annos. Semus alleghende de a su mancu 40.000 pitzocheddos, chi segundu unu raportu de Human Rights Watch,  traballant a 2 dollaros pro 12 oras a sa die. Mortos e feridos sunt cosa de ogna die,  pro non faeddare de s’espositzione a sos metallos, chi càusat problemas respiratòrios e  àteras maladias, sena ismentigare  sa luadura de s’àera e de sa terra.

Sos investimentos de sas domos automobilìsticas in su setore de sa màchina elètrica (sunt prevìdidos 100 milliardos de dollaros, est a nàrrere  88 milliardos de èuros) sunt  faghende aumentare  sa dimanda de custu minerale e de cunsighèntzia su prètziu est creschende semper de prus. Su guvernu de Kinshasa at impostu a sos imprendidores mineràrios tassas prus artas, a su puntu de arribbare a belle su 10% de su prètziu de bèndida. In prus  su Congo at detzìdidu de l’acabbare de fàghere cuntratos longos a sas cumpangias mineràrias. Ma però b’at meda corrutzione e sos interessos de sa bèndida de su cobaltu acabbant semper  in sas  butzacas de sos polìticos corrotos. Sas minieras illegales naschent comente antunna e gosi puru su nùmeru de sos iscraos congolesos chi  arriscant  ogni die sa vida e sa salude in nùmene de sa chi nois mutimus “green economy”.

“La variabile africana” (Egea, 2019, pp. 192, € 18,50) de Raffaele Masto, unu sàgiu subra sas riservas naturales de su continente africanu e de comente custas cunditzionent sos echilìbrios geopolìticos.