Imprentas 181 di Ivan Marongiu

Chernobyl. A 35 dae s’apocalisse sas radiatziones sunt in totue, ma sas matas sunt colonizende ogni cosa

Su chi si narat semper in custos casos, “nudda at a èssere comente a prima”, non semper est a beru. Pigamus pro esempiu sos padentes rujos chi a pustis de s’esplosione de su reatore de Chernobyl si sunt sicados e prus de 400 ètaros de pinos ant pigadu fogu: immoe a su postu issoro bi sunt linnarbos (pioppi)  e betullas artas 20 metros. Opuru pensamus a  sos canes abbandonados dae sos ucràinos in fua, ochidos pro ite fiat tropu perigulosu a los lassare iscapos, immoe a  su postu issoro sunt torrados sos lupos.

S’àrea a inghìriu a su reatore esplòdidu in Ucràina est divenida sa tertza riserva prus manna de Europa de flora e fàuna.  Naturalmente sos arriscos sunt semper artos. Sa resilientza de sa natura dimustrat però chi sa presèntzia de s’òmine est prus perigulosa de un’esplosione nucleare.

A palas de s’iscola mèdia de sa bidda pantasma de Pripyat, si bidet galu su pamentu de sa palestra: sas raighinas l’ant  cannidu totu e  sas paleras pro sa ginnàstica sunt imboddicadas de erbaentu (edera). Sas autoridades ucràinas ant prevìdidu su desertu atòmicu pro a su mancu 300 annos; Greenpeace, pro 20.000: «Imbetzes cando sa gente si nd’est andada», contat un’ingegneri de sa Chernobyl Exclusion Zone, unu raju de 30 km a inghìriu a sa tzentrale, «est torrada sa natura. Sas radiatziones sunt in totue, e ant efetos tremendos. Ma sunt unu fatore prus pagu perigulosu de sa presèntzia de s’òmine. Custa zona est divenida sa tertza riserva de matas e de animales in Europa. E sa rinàschida ambientale est s’ùnica cunsighèntzia positiva de cussa catàstrofe».

Imbussiadu dae sa vegetatzione est fintzas su gasi naradu “sarcòfagu” in atzàrgiu e tzimentu cun su cale est istadu sigilladu su reatore  brincadu in s’àera de Chernobyl in su 1986: sa prima cobertura est istada  afortiada dae un’àtera in sos annos sighentes.

Su disacatu nucleare prus mannu de s’istòria est trasformendesi in un’esperimentu green sena paragone.. Siat craru: 35 annos a pustis de s’esplosione de su reatore nùmeru 4 “Lenin”, cussu 26 de abrile de s‘86 chi pro su mundu est istadu su primu apretu ambientale globale, Chernobyl est un’iscenàriu orrorosu, mescamente si si pensat a totu sos mortos chi bi sunt istados. S’esplosione si podet paragonare a una bomba radioativa 500 bias prus potente de Hiroshima, chi at causadu a su mancu  30 mìgia mortos, mesu millione de isfollados, tzitades e bidditzolos isboidados, chimbe milliones de persones destinadas a controllos mèdicos costantes, migliaia de pipios malformados in totu Europa,  2.800 km cuadrados de abbas, flora e fàuna contaminados pro semper.

Segundu istimas reghentes chentinas de persones no autorizadas sunt torradas a  bìvere in intro de sa Zona proibida. Su materiale radioativu, instàbile, podet modificare o distrùere su Dna de sos animales, ma non s’ischit  si potzat fàghere su matessi cun sos vegetales.

Su logu s’est prenu de matas, ma non solu. Fintzas sos animales arestes ant colonizadu sos padentes. Immoe linces, cherbos, porcarbos, lupos, caddos e su bisonte europeu, si sunt moltiplicados sena controllu.  Est possìbile chi sa vegetatzione potzat  caturare sas radiatziones, ma su rinaschimentu birde non at limitadu  sos arriscos: nemos ischit comente  istent e canto potzant campare, custos animales contaminados.  Non s’ischit nemmancu su destinu de sos umanos torrados a bìvere in cussos logos, si siant mortos o si siant galu bios.

Stefano Mancuso, botànicu de fama mundiale e dotzente de Arboricoltura generale de s’Universidade de Firenze, at naradu: «Pro 35 annos, s’òmine no est prus torradu a Chernobyl. Sas matas si sunt isvilupadas sena frenu e immoe faghent  assimigiare cussas cussòrgias a sas ruinas cambogianas de Angkor. Tzertu, 35 annos sunt nudda in cunfrontu de sos sèculos, ma in fundu b’at una morale: sa presèntzia de s’òmine est prus dannosa de sas radiatziones». Est fintzas pro custu paradossu chi immoe  s’Ucràina pedit a s’Unesco de decrarare Chernobyl Patrimoniu de s’Umanidade…

«Est ispantosa da capatzidade de sas matas de  resistire a cunditziones chi pro  s’òmine sunt mortales- sighit Mancuso- A 300 metros dae su cratere de Hiroshima, b’at unu salighe chi est subravìvidu a un’unda radioativa de 3000°, sa temperadura de sa superfìtzie solare».

Un’iscritora, Cal Flyn,  in su libru  Islands of Abandonment , at allegadu de sa resilienza vegetale  in vàrios àngulos de su mundu: in sas zonas demilitarizadas tra sas duas Coreas e tra sas duas Cipro, in sas minieras abbandonadas de s’Iscòtzia, in sas fàbricas desertas de Detroit, in sa Zonas Rouge de Verdun. S’11 de martzu ant a èssere colados 10 annos dae s’intzidente nucleare de Fukushima e in cue puru si bient macacos e àteras martincas chi papant frutos radioativos. «Non b’at bisòngiu però de mentovare sos disastros de Ucràina o de Giapone», ispiegat Mancuso: «A totus nos est capitadu de agatare matas de figu chi nde essint dae sas canniduras de sos muros in chimentu. Opuru, totus amus bidu comente a pustis de sas coladas lavicas sas matas torrent a colonizare sas isulas vulcanicas».

Sa natura de sòlitu assèliat sos dannos fatos dae s’òmine, chi non imparat mai sa letzione. In sa Polesia, àrea paludosa tra sas prus mannas de Europa tra Bielorùssia e Ucràina, s’annu coladu s’est cumintzadu a dragare su riu Pripyat pro costruire unu canale navigàbile chi colleghet Mare Bàlticu e Mare Nieddu. Ma su Pripyat colat a presu de su reatore 4. S’arriscat de mòvere s’arena radioativa e de la fàghere acabbare in su riu chi fornit de abba sa tzitade de Kiev.

«S’òmine non pensat  mai a sas cunsighèntzias», cummentat Mancuso. «Una chirca de pagos meses a oe at riveladu comente  sos materiales inorgànicos de su Pianeta, dae su tzimentu a sa plàstica, pro sa prima borta in s’istòria apant superadu su pesu complessivu de sas biomassas, est a nàrrere su pesu de sa vida etotu. Est un’istrage. A su cumintzu de s’agricultura, 10.000 annos a oe, aiamus 6.000 milliardos de àrbores: sunt divenidos sa metade, e 2.000 milliardos sunt istados segados in sos ùrtimos 200 annos. In su 1970, in sa Terra b’aiat su dòpiu de sos animales de oe: su 96% de sos mammìferos oramai est costituidu dae umanos o dae mammìferos domèsticos o in gàbbia, solu su 4% est fàuna areste. Prus de su 70% de sos pigiones de su mundu est costituidu dae puddas de allevamentu. Nùmeros apocalìticos. Custa presuntzione de pensare de èssere sos meres de sa terra nos at a costare cara. S’universidade de Cambridge at publicadu unu raportu, Economy of Biodiversity, pro dimustrare torra chi s’òmine at sa possibilidade de sighire duos caminos: o sighet a distrùere sa natura, opuru cumentzat a la rispetare, si nono est destinada a esplòdere comente una tzentrale nucleare».

Su chi si bidet in Chernobyl, s’est bidu fintzas cun su Covid: sos crabiolos chi falaiant in sas tzitades desertas, sos delfinos in sos canales de Venètzia… Cale est sa letzione? «Chi esistent modellos diversos de isvilupu sotziale», narat Mancuso. «Nois amus costruidu sas sotziedades nostras copiende solu su modellu animale, chi est minoritàriu. Pensamus a totu sas organizatziones geràrchicas e tzentralizadas: sunt gasi  pro ite nois nos semus ispirados a sos corpos, fatos de unu cherbeddu e de òrganos chi nde dipendent. Est unu modellu chi at unu difetu, sa fragilidade: si un’òrganu si segat, totu su corpus nde sufrit. Sas matas imbetzes sunt unu modellu diferente. Totu est difùndidu, detzentradu: si una tzèlula si guastat, benit sostituida e sa mata sighet a bìvere». Comente est capitadu in sas forestas  investidas dae sas radiatziones… « Sunt mortas e ant lassadu su logu a àteros àrbores. No est unu modu diferente de pensare s’isvilupu? Sas prantas nos narant semper carchi cosa. Fintzas a Chernobyl. Diamus dèpere imparare dae issas».