Imprentas 190 del 05.06.2021 di Ivan Marongiu
- Naschet su primu giornale sardu
Sa prima testada giornalìstica isulana fiat essida in su 1793, pròpiu cando sa flota frantzesa atacaiat sa tzitade de Casteddu. De custu giornale però nde fiant essidos tres nùmeros ebbia. Duncas una vida curtza meda pro cussu follu acanta fiant essidos sos primos artìculos cun noas chi allegaiant de sos eventos de cussas tres dies. Su giornali però fiat istadu acusadu de àere farsadu sos fatos militares pro atribuire sos mèritos de sas vitòrias de sos sardos a sos piemontesos, sena donare consideru a s’aportu de sa populatzione locale ischierada cun sos militzianos e sos voluntàrios a difensa de sa tzitade. A ogni modu cun cussu follu, essidu su 25 de ghennàrgiu 1793, fiat cumentzada pro sa Sardigna s’era de sa carta imprentada.
S’istòria de sa nàschida e de sa morte de su “Gazzettino ebdomadario de Sardigna” est istada contada in su nùmeru de su 1996 de s’Almanacco de Casteddu, chi in sa colletzione sua presentat medass sàgios subra su giornalismu e sos giornalistas de sa Sardigna. Su volùmene publicadu de annu in annu dae Vittorio Scano dèdicat un’artìculeddu interessante a su Gazzettino, firmadu dae Giuseppina Catani, chircadora apassionada, ex funtzionària archivista in s’Archìviu de Istadu de Casteddu.
In realidade, comente iscriet Giuseppina Fois in s’istòria de su “Giornalismu sardu” in s’Entziclopedia imprentada dae Della Torre, bi fiat istadu unu pretzedente in su 1778 cun su Giornale Enciclopedico, unu follu cun intentos divulgativos e didàticos. Ma est su Gazzettino chi in su 1793 si proponet comente beru esperimentu giornalìsticu, sighende sos esèmpios de follos giai publicados in Itàlia, in Inghilterra e Frantza. In su 1795 at a essire s’Almanacco Parnasiano. «Esperimentos – sutalìniat Fois – a metade tra s’esertzìtziu literàriu e sps primos tentativos de informare, mancari in modu sintèticu meda».
Tocat a isetare pagu tempus pro bìdere una testada noa chi naschet cun s’intentu de fàghere informatzione: si tratat de Il Giornale di Sardegna, publicadu tra su 1795 e su 1796, òrganu de su movimentu angioinu. Fiat unu gazetinu polìticu redatadu dae bator collaboradores de Giomaria Angioy e diretu dae su teòlogu Giuseppe Melis Atzeni chi rifletiat, a su mancu in parte, sa lìnia progressista de sos Istamentos in su drammàticu perìodu de s’abbolotu contra sos piemontesos (tzelebradu ogni 28 de abrile cun sa festa de Sa Die de sa Sardigna, istabilida cun lege regionale de su 1993). Sos argumentos tratados fiant istados sos matessi chi in cuddos meses aiant animadu sa batalla antifeudale.
Podimus nàrrere chi su giornale de Angioy aiat sighidu s’esperimentu comintzadu cun tonos opostos dae su filo-piemontesu Gazzettino ebdomadario. A pustis de custas tres testadas, concruidos sos movimentos angioinos e sos avenimentos rivolutzionàrios, tocat a isetare su sèculu nou pro bìdere nàschere àteras testadas, a cumentzare dae su 1812 cun su Foglio periodico di Sardegna, in prenu perìodu napoleònicu e cun sa corte sabàuda galu esiliada in Casteddu.
Ma torramus a s’esperièntzia de su Gazzettino ebdomadario. Custu faeddu, oramai disavesadu, signìficat “publicatzione de cada chida”: derivat dae su latinu tardu hebdomadarius, chi benit dae su grecu “hebdomàs”, est a nàrrere “grupu de sete”. In s’allega de ogni die su faeddu est istadu remplasadu dae s’espressione prus fàtzile “de cada chida”. In su sàgiu bellu suo Giuseppina Catani torrat a cumpònnere sa vida curtza de su giornale chi, apuntu, deviat essire cada chida, e chi imbetzes fiat istadu istampadu in tres nùmeros ebbia: 25 ghennàrgiu, 8 e 22 freàrgiu. Fiat istadu publicadu dae sa Vera Stamperia, realizadu dae su comitadu de redatzione formadu dae su “diretore” Vincenzo Valsecchi, segretàriu de Istadu, a sa data una de sas màssimas autoridades de s’aparatu guvernativu sabàudu, e Antonio Maria Sartoris, cunsideradu s’autore de sos artìculos.
Seguru chi custa novidade fiat istada tetzida bene dae sa gente, sende ca a Casteddu arribbaiant pagos giornales: sas Gazetas de Livorno, Firenze, Cesena e Berna. A su cumintzu su giornale aiat glorigicadu su valore de sos sardos, ma sos letores prus atentos aiant bidu fintzas chi fiat tropu a presu a sa polìtica piemontesa. In su primu nùmeru aiat bantadu su coràgiu de sos isulanos pro un’episòdiu a presu de s’ìsula de Santu Antiogu: “Tres mìgia òmines a caddu e vàrias chentinas de fantes dispostos a mòrrere pro sa defensa de s’Istadu, pro sa glòria de su mègius de sos Res e pro s’amore de sa Natzione…” si fiant ischierados pro firmare sos frantzesos. Ma custa fiat una fàula, difatis totus ischiant chi su vitzeré Balbiano no aiat fatu nudda pro s’opònnere a sos atacos frantzesos e solu sos sollìtzitos de sos Istamentos e l’aiant obrigadu a reagire.
Su segundu nùmeru de s’8 de freàrgiu fiat istadu dedicadu pro su prus a sos avenimentos de su 27 e 28 de ghennàrgiu e mescamente a su bombardamentu terrorosu de su 28. Su de tres e ùrtimu nùmeru essidu su 22 de freàrgiu aiat descritu imbetzes sos avenimentos tra su 9 e su 21 de freàrgiu, mancari in cussu perìodu esserent capitados sos fatos detzisivos pro sa derrota de sos frantzesos. Ma sa cronaca de cusso acontessimentos non fiat istada retzida bene dae sos letores e aiat provocadu medas chèscias.
Sa protestat non si fiat fata isetare e sos deputados de s’Istamentu aiat denuntziadu comente in su Gazzettino ebdomadario «fiant descritos sos fatos de sa gherra, ma cun medas e graves alteratziones, neghende sa glòria de sos Sardos». Unu mese giustu dae s’ùrtimu nùmeru, su 22 de martzu, su vitzeré Balbiano si fiat agatadu custrintu a comunicare a Torinu sa serrada de su periòdicu. S’iscuntentu de sos sardos, comente est nòdidu, si fiat manifestadu in s’abbolotu de su 28 de abrile de su 1794, cun sa bogada de sos Piemontesos de s’ìsula.
Ma pro ite su Gazzetino non fiat pràghidu a sa gente? Fiat a beru unu giornale farsu opuru fiat destinadu a serrare pro ite fiat essidu in unu momentu istòricu gasi detzisivu cando s’òdiu de sos sardos contra sos piemontesos fiat lòmpidu a su màssimu?
Fiant istadas medas sas crìticas pro sas fàulas chi oe diant èssere mutidas “fake news”. Sa gente no aiat suportadu mescamente su contu de sos providimentos pigados dae su vitzeré Balbiano dae chi si fiant incraradas sas naves frantzesas in su gulfu de Casteddu: «Su vìgile Guvernu in su momentu matessi chi si fiant bidas sas naves frantzesas, at imbiadu missos a sos bidditzolos pro radunare sas Milìtzias e pro las imbiare a sa defensa…». Totu fàulas. In conclusione, tocat a ammìtere chi su giornale aiat unu còmpitu difìtzile: su de informare de sos fatos bèllicos unu pùblicu formadu dae sardos e dae piemontesos, duas Natziones diversas e cun interessos diversos: sos piemontesos rapresentaiant sos dominadores, sos sardos sos chi fiant dominados. De su Gazzettino però, mancari sa vida curtza sua, si nde allegat galu oe, non comente esèmpiu de onestade intellettuale e de informatzione impartziale e curreta, ma comente elementu nou in su panorama editoriale de fine Setighentos. Difatis aiat inauguradu s’istajone de sos giornales in s’ìsula Nostra. Fatu de seguru rilevante.
Duos annos a pustis, comente amus giai naradu, at a essire su Giornale di Sardegna pro iniziativa de sos Istamentos, pro divulgare sas noas subra de sos avenimentos drammàticos de su 1794-95: beniat distribuidu a Casteddu ogni giòbia e in sas àteras partes de su Regnu cun su Postale a caddu. Posca, dae su 28 de ghennàrgiu 1822 a su 28 de trìulas 1823 at a essire su “Foglio periodico di Sardegna” de Adolfo Palmedo, chi fiat a su servìtziu de sos inglesos contra sa Frantza napoleònica. Sos giornales comente trastu de connoschimentu polìticu e de notìtzias, fiant intrados in sa vida fitiana de sos sardos contribuende a sa difusione de sa cultura e de s’informatzione e – comente narat s’istòricu Francesco Atzeni – a sa formatzione de s’identidade de sos sardos.