di Ivan Marongiu

In su mundu, prus de su 80% de sos pitzocos de edade tra sos 11 e sos 17 annos non faghet s’atividade fìsica racumandada dae s’OMS pro un’istile de vida sanu. Unu problema chi tocat mescamente  sas pitzocas, francu in 4 Paisos (Tonga, Samoa, Afganistàn e Zàmbia), mentras sos àteros, dae su 2001 a su 2020 no ant mustradu perunu megioramentu in su nùmeru de oras dedicadas a s’atividade fìsica. A lu iscoviare est un’istùdiu de sos ricercadores de s’OMS  publicadu in sa rivista The Lancet Child & Adolescent Health, una chirca a livellu mundiale chi indagat subra  s’atividade fìsica de sos pitzocos.

Pro sa chirca sunt istados analizados sos resurtados de 298 sondàgios fatos dae s’OMS in su perìodu 2001-2020 in 146 Paisos, chi rapresentant 1,6 milliones de pitzocos (su 81,3% de su totale). Pro metade de sos Paisos (tra custos s’Itàlia) sos chircadores ant tentu a disponimentu sos datos de a su mancu 2 sondàgios realizados in su cursu de sos 20 annos in esàmene, cunsentende duncas de istabilire una tendèntzia.

Sos resurtados inditant chi, n manera cumplessiva, dae su 2001 a su 2020 su livellu de atividade fìsica fitianu est megioradu pro sos mascros, mentras non s’est osservadu perunu cambiamentu significativu pro sas fèminas. Segundu sos ricercadores, si sa tendèntzia at a restare costante, non s’at a resèssere a lòmpere a s’obietivu de una prevalèntzia de sa sedentariedade inferiore a su 70% intro su 2030.

S’Itàlia, paris cun s’Austràlia, mustrat una tendèntzia negativa cun una crèschida de prus de su 3% de su nùmeru de pitzocos inativos (àteros 6 Paisos, inclùdidos sos Istados Unidos ammustrant una crèschida majore a su 5%). In Itàlia sa prevalèntzia de pitzocos chi no faghent atividade fìsica regulare est de su 88,6%: in sos pitzocos est colada dae su 82,9% de su 2001 a su 85,9% de su 2020; in sas pitzocas dae su 90,6% de su 2001 a su 91,5% de su 2020.

Pro sos pitzocos s’OMS racumandat de fàghere a su mancu 60 minutos a sa die de atividade, de moderada e de arta intensidade. Un’adeguada cuota de atividade fìsica in sa pitzinnia megiorat difatis su sistema cardiovascolare e musculare, s’isvilupu òsseu e su controllu de su pesu de su corpus, cun profetos chi durant durante s’edade adulta. In prus, s’atividadefìsica influit in manera positiva subra sa salude mentale e sa sotzialidade. Duncasm pro sos autores de s’istùdiu, est fondamentale identificare e intervènnere subra sas càusas adotende polìticas chi istimolent s’atividade fìsica tra sos pitzocos.

Un’atividade fìsica regulare de ogna tipu tenet efetos positivos subra su cherbeddu in bia de isvilupu de sos pitzocos, e resurtat assotziada a retes tzerebrales prus efitzientes in tèrmines de organizatzione, flessibilidade e robustesa.  In pagos faeddos,  majore est s’atividadefìsica, prus “in forma” resurtat su cherbeddu. Custu est su chi nde istupat fintzas dae s’istùdiu de su Boston Children’s Hospital chi at impreadu sos datos de neuroimaging de belle ses mìgia preadolescentes. Sa chirca est istada publicada in sa rivista sientìfica Cerebral Cortex.

“No importaiat in cale tipu de atividade fìsica esserent interessados sos pitzocos, importaiat  chi esserent ativos”, afirmat Caterina Stamoulis, PhD, chircadora printzipale de s’istùdiu e diretora de su Computational Neuroscience Laboratory acanta su Boston Children’s. “Èssere ativos prus  bias a sa chida pro a su mancu 60 minutos at tentu un’efetu positivu difusu subra de sos tzicuitos tzerebrales”.

In particulare, sos chircadores ant cumproadu efetos positivos in sos tzircùitos de diversas àreas tzerebrales. Custos tzircuitos tenent ruolu fundamentale in sa funtzione cognitiva e suportant s’atentzione, s’elaboratzione sensoriale, sa funtzione motòria, sa memòria, su protzessu detzisionale e su controllu esecutivu. S’atividadefìsica regulare cumpensat fintzas sos efetos de s’ìnditze de massa mala de su corpus (BMI), chi resurtat assotziadu a efetos dannosos subra sos matessi tzircuitos tzerebrales.

Sos ricercadores ant isfrutadu sos datos de s’istùdiu a longu tèrmine subra s’isvilupu cognitivu de su cherbeddu de sos pitzocos. Ant analizadu sos datos de risonàntzia magnètica funtzionale (fMRI) de ses mìgia pitzocheddos dae 9 e 10 annos e los ant cunfrontados cun sos datos de s’atividade fìsica, impreende tècnicas computatzionales avantzadas isvilupadas in collaboratzione cun s’Harvard Medical School High Performance Computing Cluster.

“Sa prima pitzinnia est unu momentu importante meda pro s’isvilupu de su cherbeddu. Est assotziadu a medas cambiamentos in sos tzircuitos funtzionales de su cherbeddu, in particulare a sos chi suportant protzessos de livellu superiore comente su protzessu detzisionale e su controllu esecutivu. Cambiamentos anormales in custas àreas podent portare a cumportamentos de arriscu e de ammancu in sa funtzione cognitiva, chi podent acumpangiare sas persones pro totu sa vida “.

Sos datos de sa risonàntzia magnètica funtzionale sunt istados achiridos in s’istadu de pasu, cando sos pitzocos non faghiant perunu còmpitu cognitivu craru. Custu cunsentit s’anàlisi de su “connetoma”, s’architetura de sas connessiones tzerebrales chi detèrminat cantas funtziones su cherbeddu resesset a fàghere in manera efitzente e cantas si potzat adatare a sos cambiamentos de s’ambiente, in manera indipendente dae còmpitos ispetzìficos.

S’iscuadra at adeguadu sos datos pro edade gestatzionale a sa nàschida, istadu de pubertade, sessu, ratza e rèditu familiare. Sas mesuras de atividade fìsica e coinvolgimentu isportivu si basaiant subra sondàgios tra giòvanos e babbos. S’anàlisi at rilevadu chi s’atividade fìsica fiat assotziada a propiedades de retes positivas a livellu de su cherbeddu chi rifletiant sa robustesa e s’agrupamentu de su “connetoma” in tzertas regiones de su cherbeddu.

Custas matessi propiedades sunt istadas influentzadas in manera negativa dae unu BMI artu (ìnditze de massa mala de su corpus). S’atividade fìsica at tentu fintzas un’efetu positivu subra s’organizatzione locale de su cherbeddu; su BMI non sanu imbetzes at tentu impatos negativos in una pariga de sas matessi àreas.

“In base a sos resurtados nostros, retenimus chi s’atividade fìsica influat diretamente subra  s’organizatzione de su cherbeddu, ma fintzas in manera indireta reduende su BMI, atenuende duncas sos efetos negativos”, afirmat sa professora Stamoulis.

S’istrutura funtzionale otimale de su cherbeddu est costituida dae regiones minores o “nodos” chi sunt bene collegados in manera interna e imbiant informatziones a àteras partes de su cherbeddu pro mesu de cunnessiones fortes, ma relativamente pagas, a longu raju.

“Custa organizatzione perfetzionat s’eficentzia de s’elaboratzione e de sa trasmissione de sas informatziones, chi sunt galu isvilupendesi in sa pitzinnia e podet èssere alterada dae una sèrie de fatores de arriscu”, concruint sos chircadores.

“Sos resurtados nostros sugerint chi s’atividade fìsica tenet s’efetu de protègere custu protzessu de otimizatzione in totu sas regiones de su cherbeddu”.

Pro serrare, segundu s’Organizatzione Mundiale de sa Sanidade (OMS) sa fàscia de edade intre sos 12 e sos 17 annos diat dèvere fàghere ogni die a su mancu un’ora de atividade fìsica de intensidade moderada e arta  pro promòvere e mantènnere un’istadu de bona salude e su pesu in sa norma; in prus, diat èssere pretzisu inclùdere atividades ispetzìficas  pro afortiare s’aparatu mùsculu-ischeletricu a su mancu 3 bias a chida.