di Ivan Marongiu

S’initziativa isbarcat in Itàlia gràtzias a sa prataforma Cinemainospedale.it, posta a puntu de sa Cooperativa su Nuovo Fantarca de Bari, cun su contributu de su Garante pro sos deretos de sos minores de sa Regione Pùglia.

Sa Terapia de su Tzìnema est un’initizativa realizada  gràtzias a Film for kids at Hospital: unu progetu cofinantziadu dae su programa de sa Cummissione Europea “Creativas Europe” chi bidet in rete 6 assòtzios ativos in Bèlgiu, Ispagna, Croàtzia, Islovènia, Isvètzia e Itàlia.

Cun 90 ispidales pediàtricos aderentes in Europa, s’initziativa, finalizada a promòvere su tzìnema europeu de calidade in favore de sos pipios, sas pitzinnas e sos pitzocos ricoverados in ispidale o in cura domitziliare, isbarcat in Itàlia gràtzias a sa prataforma Cinemainospedale.it, posta a puntu de sa Cooperativa su Nuovo Fantarca de Bari cun s’agiudu de su Garante pro sos deretos de sos minores de sa Regione Pùglia.

72 film pro pipios e pitzocos. Pro mesu de s’iscritzione in sa prataforma si podet  atzèdere a 72 film divididos pro fàscias de edade e gènere, cunformados a un’acostamentu interculturale e multilìngue, e unidos a presentatziones cùrtzias dae banda de sos registas e ischedas fìlmicas pro mèdiu de sas cales sos pipios podent aprofundire unas cantas partes o temàticas de sa pellìcula. “Su tzìnema est unu mèdiu ùtile pro agiuare sos pipios e sos pitzocos a illebiare su tràuma provocadu dae sa maladia e cunsentit a sos adultos a si pigare cura de s’isfera emotiva de sos piticos”, at ispiegadu Rosa Ferro, diretora artìstica de su Nuovo Fantarca.

In prus, at sutaliniadu Ferro, sos istùdios leados a in antis dae sa tzimenatografia” ammustrant comente sa bisione de film creat suta su profilu psicològicu un'”efetu pàusa” pro sos malàidos, determinende un’istadu de benèssere a livellu neurològicu. Sas neuroscièntzias ant aprovadu custu acostamentu de su “neurotzìnema” arribbende a nde mesurare sos efetos fìsicos”.

Non solu film, ma fintzas laboratòrios pro sa creatzione de cartones animados. Ma non est totu. Difatis, in prus de sas pellìculas, su progetu cumprendet sa realizatzione de un’atividade didàtica pro sa creatzione de duos cartones animados realizados dae sos matessi malàidos pediàtricos cun sa ghia atenta de espertos cartonistas. “Si s’apretu Covid non nos at a permìtere de intrare a sos repartos, amus prevìdidu atividades a distàntzia pro superare sas barrieras provocadas dae sa pandemia”, at concruidu Ferro.

Si tratat duncas de una initziativa bella e ùtile, chi at a permìtere a sos pipios de superare cun prus fatzilidade su tràuma dèpidu a su ricòveru. Segundu sos espertos, paris cun su tzìnema, un’àteru istrumentu importante meda pro fàghere colare su tempus in manera costrutiva e ùtile a sos pitzinnos ricoverados, est fintzas cussu de sa letura. Pro custu in custas dies est essida una classìfica de sos libros pro pipios prus cussigiados.

Su primu s’intitulat “Katinka e la sua coda”, iscritu dae Judith Kerr e publocadu dae sa domo editora  HarperCollins.  Katinka est unu gatu mugicu, mancari sa meres sua non l’ischit. O, a su mancu, no l’ischiat finas a cando una note iscoberit chi sa mussedda sua no est in s’isterridòrgiu suo. Duncas andat a la chircare e iscoberit unu mundu meravigiosu.

Unu pagu comente su paisu acanta bivent sos “Bislunghi”, chi est acanta a cussu in ue bi sunt sos “Biscorti”. Sos duos pòpulos sunt istracos de sa paghe chi regnat dae tempus meda e detzident tando de si fàghere sa gherra. S’acanint, si cumbatint e si nde bogant sos ogros a pare, ma a sa fine una pariga de eventos curiosos los cumbinchent a fàghere sa paghe chi at a durare meda meda tempus. Su libru s’intìtulat !I Bislunghi e i biscorti” de Annalisa Strada, Editziones Nord-sud.

Bos seis mai dimandados ite b’at a s’àtera banda de su mare? Ben e Lotti lu cherent iscobèrrere e l’ant a fàghere in cumpangia de sos catedos issoro e de unu mare in traschia. Su libru chi contat custa istòria si intìtulat “Cosa c’è al di là del mare” de Natasha Farrant, Editziones Il Battello a Vapore.

Famìlias amadas e odiadas. Chie no at mai bisadu de si liberare de sa famìlia sua? Prima de pessare male de su protagonista, devides ischire chi a su cumintzu cheriat solu bèndere a sos alienos sa mannai tiranna ebbia, chi faghet bìvere a issu e a sa famìlia sua in un’aposentu iscurigosu de su mangasinu. Tando, cherides ischire comente andat a finire s’istòria de Happy e de sa famìlia istramba sua? Tando bos cunsigiamus de comporare su libru “Come vendere la tua famiglia agli alieni”, de Paul Noth Editziones Il Castoro.

Lilith est un’istudiante sena famìlia, abbandonada cando fiat dereta de nàschere in antis de sa ghenna de su collègiu de Rovoscuro. Su passadu suo abarrat un’arcanu finas a cando at a arribbare a s’iscola sua unu  cumpàngiu nou, Lucio, chi l’at a cambiare sa vida pro semper. Su libru s’intìtulat Diamante nero, e est iscritu dae F. Vanessa Arcadipane pro sas Editziones Magazzini Salani.

Brystal e sos amigos suos ant sarvadu sos inimigos issoro dae sa minetza de sa reina de sas Astras e sunt resèssidos a fàghere atzetare sa comunidade màgica in totu su mundu. Ma b’at una majargia pronta fàghere dannos, Lady Mara, e duncas totu at a cambiare de repente. Su libru si narat “Una storia di Stregoneria”, de  Chris Colfer Editziones Rizzoli.

“Sas istòrias sunt in totue” repitet sa mastra a Ralph chi sighet  a fissare su fògiu biancu suo sena chi mancu un’idea l’isfioret su cherbeddu. Ma sa solutzione est prus a sa portada de cantu non potzat pàrrere. Su libru in chistione est “La fantasmagorica storia di Ralph”, de Abby Hanlon Editziones Terre di Mezzo.

Prontos, partèntzia, papa prus pagu! Sa mama de Arthur diat fàghere de totu pro lu fàghere ditzosu, li diat pigare fintzas sa luna pro ismùrgiu. Ma fortzis no est custu chi Ralph cheret a beru. Su libru chi contat custa istària si intìtulat “Missione colazione” de Barroux e est publicadu dae sa domo editora Clichy.

Benvenuta Nat, custas sunt sas iscolas mèdias!. S’entusiasmu passat chitzo, cando sa mègius amiga sua càmbiat modu  de repente e a Nat abarrant solu unu cane, unu gatu e un’ispigru cun sos cales allegare. Su libru si mutit “Benvenuta alla medie, Nat” de Maria Scrivan Editziones Il Battello a Vapore).

Ue finint sos istùrridos chi comintzant a essire e no arribbant prus? Su porcheddeddu Oscar e sos amigos suos Nocciolina, Bizz e Krabbit s’ispàssiant fintzas solu abbarrende paris e iscarfendesi a pare a càusa de sas ispitzuladuras de su tzìntzalu. Su libru chi contat custu contu est “Oscar Superstar. Sempre più in alto”, de Greg Pizzoli pro editziones Terre di Mezzo.

Si bestit comente li oaret, s’esponet pro custu chi creet, refudat sos istereòtipos de gènere. Est Harry Styles, de X-Factor  unu de sos pluripremiados cuncurrentes de su cuncursu musicale prus famadu de su momentu. Pro connòschere s’istòria sua leghide su libru “Harry Styles. Dietro le quinte del mito”, de Danny White pro Ed. Piemme.

Ite passèntzia nche cheret pro giogare cun Emma. Rispondet semper chi nono. No, no e posca nono!. Ma una die, est s’ursigheddu suo de peluche a nàrrere chi nono a Emma… e sutzedet una cosa istrana a beru. Su libru ispassiosu si narat “Per Emma è sempre no!”, de Lodovica Cima Editziones. Il Battello a Vapore).

Bona letura a totus!!