Imprentas 156 di Ivan Marongiu

In regordu de Pepinu Mereu a 149 annos dae sa nàschida sua e a 130 annos dae sa morte

Pepinu Mereu, mutidu su poeta “maladitu”, e  poeta sotzialista, fiat nàschidu in Tonara (provìntzia de Nùgoro) su 14 de Ghennàrgiu de su 1872. Su babbu, mèdicu cundutu de sa bidda, si fiat mortu in su 1889 bufende a mala isciagura su velenu chi aiat iscambiadu pro licore. Acabbat sos istùdios a pustis de sa tertza elementare. Bidu chi in Tonara no esistiant  àteras iscolas e essende chi pro sighire diat àere dèpidu andare foras de bidda, si pensat chi aiat istudiadu a solu, comente autodidata: non s’ispiegat in manera diversa su connoschimentu suo de su latinu e de sa mitologia clàssica chi mentovat in medas poesias suas.

Dae giòvanu incumentzat a cantare e a iscrìere poesias sighende s’esèmpiu de sos poetas tonaresos prus famados comente Bachis Sulis e àteros. A 19 annos, pretzisamente su 7 de Aprile de su 1891, s’arruolat voluntàriu carabineri: durante sos chimbe annos de vida militare in sas vàrias biddas de s’Ìsula, aiat bìvidu tra Nùgoro e  Casteddu, in Osilo e in Tàtari, – logos chi ammentat paris cun sas datas in calicuna de sas poesias suas- connoschet calicunu cantadore sardu e aumentat in custa manera s’esperièntzia personale de poeta. Cantat sas poesias suas in sas festas e in sas sagras paesanas dimustrende capatzidades poèticas e de improvisatzione mannas. Custos annos (1891-1895) ant a marcare meda sa formatzione sua: leat cussèntzia de sas ingiustìtzias e de sos abusos de pòdere tìpicos de su sistema militare. Dae inoghe sa crìtica forte sua a su ruolu de sos carabineris, chi imbetzes de èssere difensores de sa giustìtzia ameddant a s’ispissu cun sos trasgressores de sa lege o peus ancora cun sos delincuentes. Significativos a custu propòsitu sos versos famados e cantados fintzas dae medas tenores sardos “Deo no isco sos carabiners/in logu nostru proite bi suni/e no arrestant sos bangaruteris”.

Pròpiu in custos annos pigat consièntzia de sos problemas sotziu-econòmicos-culturales de sa Sardigna e aderit a sas ideas sotzialistas de su tempus, unu sotzialismu utopìsticu acanta però su poeta agatat sa solutzione pro sos problemas de sas classes traballadoras, isfrutadas e tratadas male dae sos potentes. Ideas e balores sotzialistas chi Mereu difundet afidende·si a sas poesias suas pro sustentare cun onestade prima de totu, sa libertade e s’agualidade. Significativos a custu propòsitu sos versos: “Sena distinziones curiales/devimus èssere, fizos de un’insigna/liberos, rispetados, uguales”.

Sighit s’impinnu suo in favore de su sufràgiu eletorale chi sos Sotzialistas pediant cun fortza e chi su poeta de Tonara at a cantare pròpiu in su 1892, annu de sa nàschida de su Partidu sotzialista: “Si s’averat cuddu terremotu/su chi Giacu Siotto est preighende/puru su poveru hat haer votu/hap’a bider dolentes esclamende/<mea culpa> sos viles prinzipales/palatos e terrinos dividende/”.

In prus de denuntziare sas ingiustìtzias sotziales e sos abusos subidos dae su pòpulu -chi in “A Genesio Lamberti,” invitat a sa rebellia- Mereu ponet a nudu sa “colonizatzione” operada dae su regnu piemontesu e dae sos continentales, a sa cale est sutaposta sa Sardigna: “Sos vandalos chi cun briga e cuntierra/benint dae lontanu a si partire/sos frutos da chi si brujant sa terra”, e ancora: “Vile su chi sas jannas hat apertu/a s’istranzu pro benner cun sa serra/a fagher de custu logu unu desertu”.

Su poeta su 6 de Nadale de su 1895 pro motivos de salude benit cungedadu de carabineri: torrat duncas a Tonara. Sa produtzione poètica sua si dae una banda est prena de motivos melanconicos, dae s’àtera ponet s’atzentu subra sa crìtica a sos rapresentantes de sa Crèsia e de su pòdere locale; si dae una banda cumponet versos dedicados a “sa morte”, dae s’àtera iscriet cumponimentos brullanos e alligros, ritratos curtzos in punta de pinna de personàgios, figuras e fatos de sa bidda sua, Tonara. Iscriet versos irònicos e melcancònicos, comente cando in Su Testamentu, intendende oramai s’arribbu de sa morte, durante sa cunfessione acusat e frastimat, cantende cun totu su marigosore de unu coro feridu, cun tonos èpicos de violèntzia espressiva: “Po ch’imbolare unu frastimu ebbia/a chie m’hat causadu custa rutta/vivat chent’annos ma paralizzadu/dae male caducu e dae gutta”. Isdebilitadu e ispatzadu a càusa de sa tisi, “che candela de chera”, s’at a mòrrere s’11 de martzu de su 1901 a 29 annos ebbia.

In su 2012 sa domo editora Il Maestrale at publicadu sas lìteras inèditas chi Pepinu Mereu aiat imbiadu durante sos difìtziles annos chi fiat carabineri. Fiat su 30 abrile de su 1894 e Mereu giai non nde podiat prus de bestire sa divisa de s’Arma: “Un’annu ancora / posca torro a bestire antigos pannos”. Lu cunfessaiat in una lìtera in versos imbiada a su commilitone Eugeniu Unale (Putumajore, 1870-1931). Una de sas duas lìteras  pretziosas iscrita in forma poètica est istada agatada gràtzias a sa chirca de s’orgolesu Antonio Rubanu, pastore, gallerista e cultore mannu de poesia sarda. Duos manuscritos inèditos de su poeta maladitu de Tonara, sunt istados regortos e publicados in editzione crìtica dae Giancarlo Porcu in su volùmene «Lettere poetiche a Eugenio Unale» (Il Maestrale).  Si tratat de un’àteru  contributu pro connòschere mègius sa vida, sa personalidade e sa formatzione de s’autore nòdidu mescamente pro su clàssicu «A Nanni Sulis», tìtulu originale de sa prus connota «Nanneddu meu», poesia musicada dae su maistru mannu de su folclore sardu Tonino Puddu.

Est dae custas duas lìteras in rima (Rubanu at donadu a sa Comuna de Tonara e a su Colletivu Peppino Mereu sos testos originales) chi benit a foras de un’àteru canteddu de sa vida trista de su giòvanu carabineri-poeta barbaritzinu. Teniat in pessu bintitrès annos, dae bator fiat arruoladu in sa Benemèrita. Cando aiat imbiadu sas lìteras a su collega Unali fiat in servìtziu in sa caserma de Òsile. Prima fiat istadu in Casteddu, in Nùgoro e in Bonolva. Una parèntesi pagu agradèssida pro issu, cussa de sa vida militare, netzessària però pro superare su momentu de dificultade a pustis de sa morte prima de su tempus de sa mama (in su 1887) e de su babbu (in su 1889). Pro su giòvanu Pepinu, su de bator de sete frades, su sèberu de s’uniforme fiat istada belle un’òbrigu. S’ispìritu rebellu de su poeta si fiat agatadu in cuntrastu cun sas gerarchias militares. Primu: pro ite s’Arma non cheriat chi Pepinu Mereu artziaret in sos palcos de sas sagras paesanas a cantare sas poesias suas in sardu cun sos àteros poetas improvisadores. Segundu: pro ite unu superiore suo l’aiat acusadu innotzente de una fura. Protzessadu e assòrvidu, su maletrassadu de Arasulè (gasi si mutiat e si mutit galu oe su bighinadu de Tonara in ue Peppinu Mereu fiat nàschidu in su 1872) aiat detzìdidu pro custu motivu de lassare su traballu de carabineri. Fiat unu perìudu tristu e malu pro issu pro su chi fiat sutzèdidu, pròpiu comente aiat antìtzipadu a s’amigu Unali in sas duas lìteras, «In su dulche zeffiru» de su 1 abrile 1895 e «Eugeniu caru» de su 30 abrile de su matessi annu. «Mereu est vivende affligidu» iscriiat su poeta tonaresu a Eugeniu, s’amigu corale suo. Fiat afligidu e isfortunadu Pepinu Mereu. Comente si aeret su presentimentu chi sa morte èsseret oramai a presu. Comente si cussos 29 annos de edade esserent pro isse giai unu pesu mannu de bajulare, comente si èsseret consumadu «chi candel’e chera».

In su mentres, «su 6 de nadale 1895 Mereu benit cungedadu pro infermidade, malàidu de tubercolosi» ammentat Giancarlo Porcu in sa regorta «Poesie complete» (Il Maestrale), publicada sa primu borta in su 2004 e torrada a publicare currègida in su 2007. Tzertu no est pro nudda si s’oramai ex militare de s’Arma, torradu in soledade a Tonara, in s’agabbu de s’Otighentos intendiat unu marigosore in buca. S’amigu fidadu Nanneddu, su mèdicu Giovanni Sulis, in su 1899 aiat pigadu s’initziativa e aiat fatu publicare dae s’editore Valdés de Casteddu su primu volùmene de sas «Poesias» de Peppinu Mereu, regalende a nois una eredidade de grandu valore poèricu e culturale. Pepinu Mereu, poeta maladitu, malassortadu, ma mescamente ispìritu lìberu e democràticu de fide sotzialista, giai in su 1893 aiat esordidu publichende «Adiosu a Nùgoro» in sa rivista «L’illustrazione sarda». Ait collaboradu posca cun «L’idea socialista» e «La piccola rivista», finas a su 1899. Duos annos a pustis, s’11 martzu de su 1901, s’at a mòrrere. Teniat 29 annos, lòmpidos su 14 de ghennàrgiu.