di Ivan Marongiu

Segundu sa traditzione sa primu gara poetica fiat istada fata in Otieri gràtzias a su cantadore Antoni Cubeddu. Cubeddu fiat nàschidu in Otieri su 25 de abrile de su 1863 e mortu in Roma in su cabudanni de su 1955 a s’edade de 92. Poeta improvisadore de craru talentu, est cunsideradu s’ideadore  de sa prima gara moderna de poesia estemporànea sarda, chi si fiat acumprida in su mese de cabudanni de su 1896 in Otieri, biddas sua, in ocasione de sa festa de sa Madonna de su Remèdiu. Custa però no est beridade istòrica ma, in manera simple, unu creìngiu populare derivadu dae custu sonetu atribuidu a su poeta otieresu etotu:

Si de ischire disizosu sese

cussa data prezzisa, giusta e giara,

pinna e tinteri, lettore prepara,

a taccuinu signala, si crese:

de s’otighentos su norantasese,

pro iniziativa mia rara,

amus fattu sa prima bella gara,

de cabidanni su bindighi ‘e mese

in Uthieri, sa mia dimora,

in occajone ‘e sa festa nodìda

de su Remediu, pro Nostra Segnora,

sa poetica gara hat tentu vida

e dae tale tempus est ancora

pro dogni festa sarda preferida.

Però, in su 1894, su mannu istudiosu de poesia sarda, Pietro Nurra in sa Rivista de sas Traditziones Populares Italianas, a cura de Angelo De Gubernatis, aiat publicadu custu sàgiu:

“In ocasione de sa Vèrgine de Talia, chi si tzèlebrat cada annu, in S’Ulumedu, su 1° de maju , aia tentu sa fortuna de pòdere assistire a una Gara de Poesia estemporànea e de nde trascrìere medas partes … Sa gara bi fiat istada a su sero dee su Gèperu, e b’aiant pigadu parte tres cantadore a bolu: Giuseppe Tidore de S’Ulumedu, unu de sa Nurra, de su cale no ammento su nùmene, e su famadu Billìa Carta.”

Pepe Tidore fiat nàschidu in S’Alighera in su 1845 (mortu su 24 de maju de su 1917), de professione fraigamuros, fìgiu de sos olmedesos Giovanni (Butegheri) e Angela Maria Nughes; su poeta de sa Nurra diat pòdere èssere Antonio Cugurra de Portu Turre; Carta Giovanni Maria (nòdidu Billìa) fiat nàschidu in Tatari in su 1871, fiat sabateri, fìgiu de su Carbonaju Angelo Maria e de Masala Andreana, cojuadu e residente fintzas issu in S’Ulumedu, acanta si fiat mortu su 5 de freàrgiu de su 1908.

Custa gara si fiat fata tres annos in antis de cudda organizada dae Tiu Cubeddu e bastat custu pro ismintzire sa primogenidura de sa Gara de su 15 de Cabudanni 1896, in ocasione de sa B.V. de su Remèdiu in Otieri; custu non cheret nàrrere chi sa  de S’Ulumedu siat sa 1^ cumpetitzione in versos cantados de s’Istòria, ca totu sas garas poèticas naschent cun su Pòpulu Sardu e, duncas, si perdent in sa note de sos tempos. Sas garas si faghinat giai dae meda sèculos prima in ogna banda de Sardigna, bastat pensare a  su mìticu “Tigellio”, de època Romana e fintzas a àteros poetas a in antis de issu.

Calicunu sèculu a oe, cando ancora no esistiant sos palcos modulares, sos protagonistas de sos ispetàculos incarrigados dae sos obrieris de sas festas de sas biddas nostras, cantaiant is sas pratzas de sas crèsias parrochiales, acanta sa gente acudiat a los iscurtare, opuru si poniant subra de impalcaduras de linna, comente cussas de sos mastros de linna.

Cando si faeddat de oralidade a propòsitu de sos mannos poetas nostros de su Noighentos (ma fintzas de s’Otighentos e de su Setighentos), non si devet pessare chi si tratet de unu sistema e de modos de comunicatzione totu istagiados dae s’iscritura, dae chi sos duos sistemas comunicant tra issos e non si podent istagiare cun unu trincu netu. Mescamente pro sa poesia, fintzas sa poesia estemporànea, devimus nàrrere chi su primu sistema, su de s’oralidade, est istadu semper contaminadu dae su segundu.

Duncas  sos poetas comente  Antonio Cubeddu dant boghe a sa cultura traditzionalmente cunsignada a sa trasmissione orale, ma custa oralidade si contaminat e rafinat, in formas a bias creativas meda, cun sos temas, sos mecanismos e sas formas de s’iscritura. Cussa contaminatzione fiat possìbile ca su sistema culturale sardu tando fiat forte e ricu. Oe sas intrusiones e interferèntzias, linguìsticas e culturales, de su sistema prus forte (cuddu italianu) in diretzione de cuddu devènnidu semper prus dèbile e semper prus in manera passiva ritzetivu (cuddu sardu) tendent a  destruturare e a pònnere in grave crisi sa cultura sarda cun totus sos balores suos, formas espressivas e modellos de comunicatzione.

Un’aspetu macroscòpicu de custu fenòmenu si podet bìdere in sa grandu bundàntzia de interferèntzias lessicales de s’italianu. In una sola gara (Nughedu 1911) podimus lèghere belle de sighida prèstidos de italianismos comente “contadinos”, “sucumbat” (Pirastru), “pusillamine pitzinna” e “t’ismarris” (Contini). In un’àtera (Otieri 1911) agatamus “tagliana” e àteros prestito dae s’italianu.

Un’aspetu chi est in gènere non cunsideradu dae sos istudiosos, est ligadu a sa comunicatzione teatrale implìtzita in sos modellos de s’oralidade. Sa comunicatzione orale est difatis pluricòdighe, comente cussa teatrale, proi ite est costituida dae su faeddu e dae sos còdighes non verbales comente  sa gestualidade, sa gestione particulare de sos ispàtzios, su movimentu de su corpus, sa mìmica, s’intonatzione, sas pàusas e su mudìmene. Custos non sunt aspetos agiuntivos, ma costitutivos. Teatrale etotu devet èssere cunsiderada fintzas sa  situatzione comunicativa de tipu cara a cara, chi si basat in manera sustantziale in sos diàlogos.

Tra sos mègius interpretes de s’improvisatzione poetica, chi aiat meda de teatrale, depimus contare pròpiu a Antoni Cubeddu, nòdidu cun s’apellativu de “poeta segnore”. Cubeddu fiat nàschidu in  Otieri su 25 de abrile de su 1863. Si fiat còjuadu giòvanu meda cun Speranza Ghera, de cale at a tènnere oto fìgios. Coltivat sa poesia in modu naturale, sende chi fintzas su babbu Giovanni fiat un’apretziadu poeta satìricu e a su ramu familiare suo diat apartènnere fintzas Padre Luca, su prèide insegnante e poeta de Patada. Dotadu de una “bella boghe melodiosa meda”, chi l’at a permìtere una carriera ispantosa e longa e una  meritada istima populare, ricamaiat versos elegante, garbos e creativos.

Comente totu sos poetas estemporàneos, durante su fascimu acabbat de cantare in pùblicu. A sa ripresa, su decanu de sos poetas, at a èssere protagonista de disputas istòricas fintzas a su 1949. Pro belle totu sa vida at partetzipadu a diversas garas poèticas subra de sos palcos de sas biddas sardas cantende cun sos mègius poetas de sa generatzione sua, comente Giuseppe Pirastru, Gavino Contene, Salvatore Testone e Sebastiano Morete. Antonio Cubeddu s’at a mòrrere a Roma su 23 de cabudanni de su 1955. At a èssere ammentadu comente “su reguladore e ordinadore de sa gara improvisada moderna”, ma una de sas cosas chi tocat a li reconnòschere de prus est  cussa operatzione, belle “sindacale”, de fàghere atribuire unu paga a sos poetas pro sas esibitziones poèticas.

In su Premiu de Otieri, prèmiu de poesia prus  famadude sa Sardigna, una de sas setziones de gara prus importantes est cussa mutida Tra Poesia e Càntigu “Antoni Cubeddu”.