Imprentas 163 di Ivan Marongiu
S’est mortu Carlo Vespa, su “Sebastiano Todde” autore e vocalista de sos Banda Beni
A pustis de sa dispedida in su mese de ghennàrgiu 2020 de su cantante Mario Biggio, est a nàrrere “Ziu Lilliccu”, torra unu lutu at corpidu sa banda istòrica sarda de sos “Banda Beni”. S’est mortu Carlo Vespa, vocalista de su grupu connotu cun su pseudònimu de Sebastiano Todde, frade de Filippo.
A daare sa noa mala est istada sa pàgina facebook de sa banda: «Notesta nos at lassadu s’istimadu Carlo Vespa, dae annos medas amigu e cumpàngiu de biàgiu nostru. Pro nois issu fiat Sebastiano Todde, compare de Ziu Lilliccu, autore e intèrprete de una pariga de sas prus bellas cantzones nostras. Ma Carlo est istadu “unu de sos mègius, si non su mègius, vocalistas de sos annos ’70 e ’80” — at iscritu s’amigu Paolo Porcu. Aiat unu timbru de boghe particulare e personale a beru e at iscritu medas cantzones bellas, calicuna de custas inèditas puru. De sas formatziones chi at fatu parte subenimus “40° parallelo” e “Mammuth ’77”, chi posca at a divènnere “Il Gruppone” cun sa publicatzione de su ’45 giros “Bella” e “Il Vecchio con l’armonica” — branu iscritu pròpiu dae Carlo. Immoe podet cantare “Grazias a Deus” paris cun su nostru Mario Biggio in Paradisu», mortu un su mese de ghennàrgiu de s’annu coladu.
sos Banda Beni non sunt istados unu grupu musicale ebbia, ma sos imbentores de su Rock-Cabaret, nùmene bogadu dae Antonello Severino. In cada serada ogna cantzones beniat pretzèdida dae trallalleros e iscenas ispassiosas acanta partetzipaiat fintzas su pùblicu. Est istadu pròpiu custu modu de fàghere brulleri a fàghere sa fortuna issoro.
Fiant nàschidos in su 1976, cando in su programma Nobody Nosus de sa ràdiu lìbera casteddaja Rama Sound, faghent sa prima essida issoro duos pessonàgios: Nicola Il Ciabattino e su Professor Cruculeus, ambos duos interpretados dae Mario Biggio. Est inoghe chi Marcello Mazzella, chi tando aiat parte in sa ràdiu e in s’eticheta discogràfica in pessu ingendrada La Strega Records, intendet pro sa primu borta Sa ballara de Ziu Lilliccu, primu tìtulu de su cantzone. Iscritu dae Mario Biggio benit sonadu dae Gli Scuali 71 paris cun sos frades carrales Carlo e Filippo Vespa. S’ora de unu provinu e naschet sa formatzione de sos Banda Beni chi pùblicat su primu 45 giros (“Ziu Lilliccu” e “Mamma tua”). Sos Banda Beni in sas seradas issoro proponiant iscenas còmicas e tzascos ispassiosos. Togas meda sas versiones umorìsticas de branos famados comente “Rock around the clock” de Haley, torradu a mutire “Rock e poi mi crock”, opuru “Day Tripper” , furriada in “Di ‘e trippa”, o ancora “Somebody to love” torrada a intitulare “Simeone Locci”. Fiant musitzistas e cabaretistas in su matessi tempus. In su 1977, in sa sienda de su babbu de un’amigu de Mario benit giradu su chi si diat pòdere definire unu de sos primos videoclip fatos in Sardigna e forsis in Itàlia puru: unu filmadu in biancu e nieddu acumpangiadu dae sas notas de “Ziu Lilliccu”. Su vìdeu fiat andadu in direta in Videolina, cussa puru nàschida dae pagu, in sas pàusas de sa programmatzione. Sos Banda Beni oramai aiant conchistadu su pùblicu isulanu.
S’annu a pustis, su 3 de argiolas 1978, sa primu serada issoro a Santu Sidoru, cun solu duas chiterras e unu repertòriu de una pariga de cantzones ebbia. Est in custa ocasione chi Giorgio Ghiglieri at a devènnere fònicu de sa truma. A cabudanni partètzipant a su Cantagiro: in s’stàdiu de Sant’Elia, in dae in antis de unu pùblicu de 10.000 persones, presentant una versione galu provisòria de “Deu” prus connota comente “Bella Calasetta”. Su branu at a divènnere belle una cantzone de cultu (in su 1985 su Comunu de Cala Seda at dare sa tzitadinàntzia onorària a Mario Biggio). Pagu a pustis at a essire su primu album fortunadu issoro a sos calens nd’ant a sighire àteros.
In su 2015, a pustis de 15 annos de mudìmine, est essidu”Compillescion”, cun sas cantzones prus connotas de sa truma, antitzipadu dae s’abertura de su situ ìnternet.
“Compillescion”, album publicadu dae La Strega Records de Marcello Mazzella chi aiat produidu custu traballu paris cun Marco Biggio, cuntenet branos famados comente “Ziu Lilliccu”, “Deu” (… Bella Calasetta), “Mamma tua”, “Natali”, “Cantu ‘e coru” e àteras. Bìndigi cantzones leadas dae sos discos in vinile originales torrados a masterizare dae Giorgio Ghiglieri, fònicu istòricu de sa truma. Pro s’ocasione sos Banda Beni sunt torrados fintza in sala de registratzione pro registrare s’inèditu “Ai laviu english”. Sa crobechedda de su discu est de Peppino Spanu, sa grafica de Valentina Mazzella e sas fotos de Giorgio Biolchini.
In su mese de cabudanni de su 2018, istorchende su primu Ziu Lilliccu, essit Succubeeh un branu chi contat de sa rassignatzione de is berbeghes. Firmadu dae Mario, est torra èditu dae La Strega Records de Marcello e pro sa primu bia benit distribuidu in ìnternet. In su 2019 essit su sìngulu GRAZIAS A DEUS, ED. LA STREGA RECORD, cun testu de Mario Biggio, musica de Carlo Vespa e Francesco Corda, boghes de Mario Biggio, Carlo Vespa, Filippo Vespa, Efisio Chessa, registradu e mixadu dae Giuseppe Aledda.
A ogna contu, comente amus naradu, sos primos ispetaculos de sos Banda Beni sunt de su 1978, comente cussu de Sarrocu e de Cuartuciu su 18 de cabudanni. In custas duas datas fiat istados sonados in primos branos cuntènnidos in su primu LP: Banda Beni. Sa copertina de s’album fiat ispirada a cussu bianca de sos Beatles, mudada però a nieddu, cun su logo de sa formatzione.
Sa formatzione originaria de su grupu fiat: Lilliccu Cherchi, su fìgiu Felicetto Lecca e su compare Sebastiano Todde. In su primu LP, in prus de sa cantzone Ziu Lilliccu e Deu, b’aiat àteros noe cantos: dae su rock de “Dì ‘e trippa” e “Simeone Locci” a su melòdicu “Ninna Nanna”, musicada dae Filippo e dedicada dae Mario a su fìgiu deretu de nàschere. Sos àteros tìtulos fiant “Gavino Tanduli”, chi contat s’istòria istràmbade s’omònimu bandidu, sa coinvolgente e semprebirde “Mama Tua. Ariseu” chi at rèndidu protagonista sa pratza de Samugheu, e “Su Vicariu” s’istòria de unu prèideru chi in prus de sos impinnos pastorales si deviat ocupare de problemas de sa sorre. Famadu su versu acanta narat: “Ho i fedelli, ho la gente mia, e tengu puru ‘na sorri de coiai”.
Su grupu sighit a s’esibire in sas pratzas comente in su Bastione de Casteddu, a Domusnovas e a Guasila, ma cumentzat fintzas partetzipare a programma televisivos comente La Voce Sarda. Sa ràdiu sighit a mandare in unda sas cantzones de sos Banda Beni e sighit puru sos invitos in sa televisione, comente a Videolina in unu programma conduidu dae Maurizio Costanzo e Simona Izzo, sa matessi die chi si fiat esibidos sos Platters.
Sos giornales, in sas pàginas musicales, allegant medas de sa truma sarda, comente sa Stampa de Torino chi in su 1982 dedicat a su grupu unu bellu articulu. In su matessi annu, in su 1982, benint invitados in sos istudios de sa Rai pro registrare “L’Università della canzonetta”. Su programma fiat contivigiadu dae s’iscritore/cantautore Gianfranco Manfredi e dae Ricky Gianco (Riccardo Sanna, originàriu de Carbonia).
Torrados a Sardigna, sa banda abrontat su tertzu #LP e torrat a si esibire in sos cuntzertos e in sas pratzas. In trìulas partetzipat a su Fèstival Internatzionale “Sa Ferula” in s’Anfiteatru de Casteddu organizadu dae Enrico Marongiu. Sos Banda Beni si sunt semper interessados a su problema de s’emigratzione: unu problema intesu meda in cuddos annos… e fortzis fintzas oe. Tra sos petzos chi tratant custu tema, a parte “Rivers of Pabillon’s”, non podimus ismentigare “Simeone Locci”: emigradu dae annos medas chi, a pustis de aere abbandonadu sa bidda e sa familia sua pro traballare, torrat a domo e agatat sos logos e sos afetos caros. Su petzu cuntenet fintzas s’orgolliosa decraratzione de amore pro s’Ìsula: “m’intendu prus sardu chi mai”! In su 1985 sos Banda Beni sunt ospites de Sardigna Canta acanta leghent sas lìteras de sos ispetadores. Famada cussa de unu detentu in su càrtzere de Nùgoro, cun tantu de poesia. E cussa at a èssere una de sas urtimas essidas issoro e posca prus nudda pro 15 annos.