Imprentas 17 del 04.01.2021 di Ivan Marongiu

S’algoritmu de Tik Tok est ipnòticu e s’iscopu suo est cussu de poderare pitzigados sos utentes a su telefoneddu: cun 2 milliardos de iscarrigamentos e in prus de 800 milliones de impreadores ativos est cambiende su consumu de sas retes sotziales de una generatzione intrea.

In  Netflix b’est unu documentàriu interessante meda subra custu tema a tìtulu – The Social Dilemma. Su documentàriu afrontat su tema èticu chi b’est a palas de su modellu de business de sas retes sotziales: sas mègius mentes de sa Silicon Valley sunt traballende pro creare dipendèntzias. Cun su duopòliu Google-Facebook de su mercadu publitzitàriu online, difatis semus passados dae unu modellu de interrutzione publitzitària a unu modellu in ue su programa est sa publitzidade matessi, mentras est s’ispetadore a costituire su produtu. In pagos faeddos est sa tv chi  imparat dae  sos cussìgios tuos, bendende su profilu cumportamentale de s’ispetadore a sos investidores publitzitàrios.

The Social Dilemma afrontat bene meda sas chistiones èticas e morales de su modellu de business basadu subra sa massimizatzione de sos profitos de investimentos publitzitàrios: s’algoritmu est costruidu pro nos propònnere non su chi est mègius pro nois, ma su chi prus rispondet a sos obietivos econòmicos de sas Big Tech. Nos poderat semper cuntènnidos dandenos sos resurtados de chirca chi nos praghent, creende dipendèntzia (bastat a pensare a su cumportamentu abitudinàriu de abbaidare su smartphone ogni 30 segundos). Comente  èsseres umanos non resessamus a moderare custa dipendèntzua, pro ite  isfrutat reatziones fisiològicas de base comente a s’emissione de dopamina, duncas s’algoritmu e s’intelligèntzia artifitziale binchent semper, fatzilitende sa polarizatzione de ideas e opiniones, sa propagatzione de fake news e populismos.

Su chi ispantat de prus – fintzas in The Social Dilemma – est s’ausèntzia de discussione a inghìriu a TikTok, chi no est comente totus sas àteras retes sotziales: su target 13-17 abbos (belle su 30% de sos impitadores), s’impreu esclusivu de su formadu vìdeo, su feed personalizadu in manera estrema e basadu subra s’idea ossessiva de “contenutos noos pro tue”, su focus subra s’esibitzione de se (e de su corpus pròpiu) lu rendent unu beru e esperimentu sotziale. Ma a chie apartenet TikTok?

A su tzentru de una gherra informàtica tra Istados Unidos e Tzina, su colletivu Anonymous in definiat TikTok unu spyware de su guvernu tzinesu e cussigiaiat de eliminare deretu s’aplicatzione dae totu sos tzellulares. TikTok est a beru de propiedade de sa tzinesa ByteDance, multinatzionale fundada dae  Zhang Yiming, classe 1983, – unu passadu in Microsoft – chi bantat balàngios pro 25 milliardos de dòllaros e unu balore de mercadu de prus de 100 milliardos. Pro fàghere unu cunfrontu, ByteDance est 5 bias prus manna de  comente fiat Google a sa matessi edade. E tocat a tènnere contu chi Google est istada sa startup cun sa crèschida prus lestra a su mundu, finas a oe.

Zhang Yiming est unu pessonàgiu brillante e s’istòria sua faghet riflètere. In su 2011, cumbintu chi su futuru esseret in sos telefoneddos intelligentes, cuntzentrat su traballu suo subra sos algoritmos de sos motores de chirca. Su resurtadu in su 2012 est Toutiao, sa prima aplicatzione virale sua in Tzina, cun unu feed de noas infinidu basadu subra sos gustos de sos impitadores. Toutiao in duos annos arribbat a prus de 13 milliones de impitadores ativos sa die. In su cabudanni 2015 Zhang rèplicat su matessi algoritmu intelligente pro sos videos e lantzat Douyin. Cun s’achirimentu, pro 800 milliones de dòllaros, de s’aplicativu de sincronizatzione labiale de sa Shangai Musical.ly, in su 2017 TikTok faghet s’esòrdiu suo.

In su 2018, Pechinu aiat bandidu unas cantas app de ByteDance e in particulare Neihan Duanzi. Zhang, in una lìtera ufitziale de iscusas, aiat decraradu “Non nos rendìamus contu chi sa tecnologia deviat èssere ghiada dae sos balores sotzialistas fundamentales”, afirmende fintzas chi s’app teniat un’implementatzione “dèbile” de su pensamentu de Xi Jinping e promitende chi ByteDance diat àere “galu aprofundidu de prus sa cooperatzione” cun su Partidu comunista tzinesu pro promòvere mègius sas polìticas suas. Est istadu posca  meda agressivu in sos cunfrontos de sos crìticos americanos, acusende publicamente Facebook de s’impinnare in una campagna “difamatoria” pro nche bogare TikTok dae sos Istados Unidos, eliminende unu cuncurrente.

Mancari su cunfrontu feu cun Zuckerberg – chi cun s’introdutzione de su formadu Reel in Instagram rèplicat sas funtzionalidades de su competitore tzinesu, unu pagu comente  aiat giai fatu contra Snapchat – e cussu ateretantu feu cun s’amministratzione Trump, TikToK sighit a crèschere: s’app comente naradu est istada iscarrigada 2 milliardos de bias, tenet prus de 800 milliones de impitadores ativos ogni die e in sos Istados Unidos dae ghennàrgiu 2018 est crèschida de su 800%, superende YouTube pro profetos e paregiende Instagram pro nùmeru de impitadores ativos abituales. immoe totus nde faeddant, dae sos cuotidianos a sos giornales de setore.

In Itàlia a sa fine de su 2019 si registraiant 6 milliones de impitadores cun una crèschida in 3 meses ebbia de su 200% de download. Fintzas sos pitzocos italianos tando tenent a disponimentu una sèrie de funtzionalidades simples meda pro realizare video cùrtzios in pagu tempus, istrochende sas tzelebridades e fintzas balangiende dinari: bastat invitare un’amigu, pompiare pro unu tot de minutos su vìdeo  e creare àteros videos) chi pro ogna visualizatzione dant monedas virtuales (rapresentados dae rubinos e diamantes) chi podent èssere trasformadas in dinari beru de trasferire in una PayPal.

A banda sos sòlitos Vacchi, Ferragni, etzètera sos protagonistas a sa fine sunt semper piseddos giòvanos e giòvanos meda. Una colletzione de cantzones e ballitos ispassiosos cun trapper, pitzinneddos tatuados, piseddas mesu ispogiadas, cun totu su degradu italianu fatu de ignoràntzia e bestidos firmados, rolex farsos, màchinas trucadas.

Gabriele Bianchi, classe 1994, cun vàrios pretzedentes, acusadu de sa morte voluntària de Willy Duarte paris cun su frade e àteros delincuentes, tenet ancora ativu unu profilu TikTok: 27mila follower, 84mila like. Su vìdeu acanta semper paris cun su frade faghent boxe, est lòmpidu a 2600 like.

TikTok est capatzu de creare dipendèntzia pro ite cumbinat variedade, sìntesi, e fatzilidade: sas matessi caraterìsticas de una slot machine. Sas ùrtimas istimas narant chi giòvanos dae 13 a 17 annos e giòvanos dae 18 a 24 annos, ocupant sa prataforma pro belle su 70% de su totale de sos impitadores. De sos 6 milliones de iscritos totales in Itàlia, prus de 4 milliones sunt pitzocos chi impreant in manera fitina  sas retes sotziales e in mescamente TikTok.

Sunt sos matessi chi, segundu sos datos Ocse, in iscola tenent cumpetèntzias de letura e de iscièntzias inferiores a sas chi teniant sos fedales issoro deghe annos a oe. Un’istudiante subra bator non cumprendet su chi leghet, est analfabeta funtzionale. Intervistadu a sa fine de su 2019, s’istòricu Gianni Oliva, tra sos culpèvoles de custa situatzione poniat fintzas su smartphone: “B’at s’abitùdine a lèghere cun sos ogros e non cun sa conca”, “In unu telefoneddu b’at totu custu chi s’umanidade at prodùidu, sende chi no amus ancora imparadu a l’impreare. Acumulamus noas chi non si trasformant in connoschimentu”. Oe sos pitzocos s’agatant in manu una prataforma chi creat dipendèntzia, furat meda tempus, lìmitat sas capatzidades de cuntzentratzione e est pagu trasparente, sende chi no est craru acanta finant sos datos. Però ischint ballare.