Imprentas 179  di Ivan Marongiu

Maria Teresa Guerrato Nardini, sa madrina de gherra de sa Brigata Sassari

De sa Prima Gherra Mundiale sunt connotas sas  gestas de cabbale de sa Brigata “Sassari”, sas batallas in mesu a sas trintzeas de su Carsu, sos atacos a bajoneta, su coràgiu de sos medas eroes, su sacrifìtziu de sàmbene de una generatzione intrea de giòvanos mortos a  20 e fintzas a 17 annos.

Prus pagu nòdidu, ma de seguru dignu de mentovu, est su ruolu chi aiat tentu una balentiosa fèmina de Bassano del Grappa chi cun unu grandu atu de solidariedade aiat dadu a sos “sassarinos” cuddu cunfortu e amore chi mamas e sorres dae sa Sardigna non lis podiant dare, pro ite fiant a tesu meda, dae s’àtera banda de su mare.

Difatis sos sordados chi abbarraiant feridos, a bias traumatizados, beniant leados a sos ispidales de campu, acanta beniant curados e cunfortados dae un’àteru esèrtzitu de dutores e de infermieras de sa rughe ruja, a s’ispissu voluntàrias, chi cun grandu impinnu, chircaiant de alleviare su dolore e sas suferèntzias de sos sordados italianos.

Una de custas infermieras fiat Maria Teresa Guerrato, pobidda de Valerio Nardini, propietàriu paris cun sos frades de s’omònima distilleria de Bassano, decrarada zona de gherra dae su cumintzu de sas operatziones bellicas. Bassano, essende pròpiu a costadu de sa lìnia de su Fronte, fiat istada esposta in manera inevitàbile a sos arriscos de sa gherra e aiat connotu dae curtzu sos dolores e sos disacatos causados dae unu cunflitu sambenosu  chi a s’Itàlia fiat costada unu tributu de 650.000 mortos, belle totu giòvanos.

Maria Teresa, infermiera voluntària de s’ispidale militare paris a unu grupu minore de fèminas, fiat istadu pròpiu inoghe chi aiat comintzadu a connòschere sos primos fantes de sa “Sassari” chi lompiant a sos ispidales de campu cun feridas graves: sena cambas, sena manos, atzegados, intossicados e traumatizados. Difatis, tra totu sos males chi corpiant sos fantes, su prus frecuente fiat pròpiu su tràuma psicològicu. Sos sordados, chi pro su prus fiant piseddos de su sud chi finas a tando sos unicos campos chi aiant bidu fiant sos campos de trigu, a pustis de un’addestramentu lestru e aprossimativu, beniant mandados cun sa fortza in sos campos de batalla a cumbàtere contra unu nemigu chi mancu connoschiant, sena armas addatas, male bestidos  e cun pagu munitzionamentu. Medas bidiant sos cumpangios issoro morende pro cancrena in sas tzintzeras, àteros assistiant a iscenas comente s’esplosione de bombas chi faghiant a canteddos pitzocos de 20 annos. Immaginadebos cale deviat essere su shock chi deviant bagiulare. Nemos si podiat riefudare de sighire sos ordines, pro ite s’alternativa fiat sa corte martziale e posca su fosilamentu.

Sa Brigata fiat lòmpida in  Vèneto a sa fine de su mese de maju de su 1916, pro agiudare sas populatziones e a defensa de sos territòrios de su Nord a pustis de s’ofensiva manna de sos austrìacos in su fronte de su Tirolu meridionale. S’interventu de sos sassarinos fiat istadu comente sa manu de Deus. Difatis in cussu momentu sos italianos fiant sufrende meda sos atacos de su nemigu, e sena s’interventu de sos sardos sos austriacos diant àere isfundadu sas lineas e diant èssere intrados fintzas a sas retovias.

Est custu su cuntestu acanta Maria Teresa, chi aiat postu a disponimentu sas istallas de palatzu Nardini pro sos caddos de sos ufitziales de su 151° regimentu de sa “Sassari”, connoschet su capitanu Alfredo Graziani, cavallegeri de su regimentu “Piacenza”, chi aiat pedidu e otentu dae sos generales su trasferimentu pro gherrare cun sos curregionales sardos e cun s’amigu Emilio Lussu.

A pagu a pagu, a sos saludos chi ogna tantu  lompiant a su Fronte a su capitanu Graziani, si fiant agiuntos fintzas sos donos e sos regalos chi sa sennora Maria Teresa destinaiat a totu sa Cumpangia e manu a manu  fintzas a totus sas àteras Cumpangias de totu su 151° Regimentu. Maria Teresa ogna chida regolliat unu muntone de mertze fatu de sas biddas venetas, las carraiat in unu carru tiradu dae unu caddu e las ammuntonaiat in domo sua, isetende su momentu addatu pro nche las podere mandare a su fronte, comente benes de cunfortu pro sos sordados. Sa gente, mancari in cussu periudu su famine esseret meda, cando ischiat chi sa cosa fiat pro sos sassarinos, daiat su pagu chi aiat in sinnu de gratitudine pro su chi sos sardos fiat faghende pro cussas populatziones.

Semper de prus dae Bassano lompiant a s’Altipianu in manera regulare berritas dae lana, iscarpas, mìgias e calicuna ampulla de abbardente produida in sas distellerias de sa famìlia Nardini, connota in totu su nord Itàlia pro sa calidade sua e pro custu apretzada meda dae sos sordados. In pagu tempus sa sennora Nardini, fiat devènnida famada meda tra sos sordados isulanos, a su puntu chi in medas la cunsideraiat comente chi esseret “sa madrina” de totu sa Brigata. Sa “Brigata Sassari”fiat  abarrada in s’Altipiano de Asiago pro prus de un’annu. Lòmpida  su 5 de mese de làmpadas de su 1916 fiat abarrada de sighidu in su fronte finas a su 1° de cabudanni, cando, pro more de sas medas pèrdidas e de sos medas feridos chi aiat tentu in cussos meses de gherra, fiat istada mandada pro unas cantas dies in litzèntzia.

Sa Brigata aiat lassadu in modu definitivu s’Altipiano in su mese de trìulas de su 1917, a pustis de medas batallas sambenosas , fintzas a s’arma bianca, chi aiat causadu àteros mortos e àteros feridos graves. Ma a parte sos cumbatimetos in su fronte, in sos periòdos de pasu, sos tatatinos imbetzes de si pasare, sighiant a serbire s’esèrtziu  impignendesi in  traballos de caràtere tzivile in sas retrovias, cun  temperaduras bàscias meda,chi in ierru falaiant fintzas a – 25°.

Cando sas batallas fiat prus frecuentes, cando sos generales ordinaiant a sos fantes de nde essire dae sas trintzeras pro atacare su nemigu, sos mortos si contaiant a chentinas. Medas fiant fintzas sos fertos chi beniant leados deretu a s’ispidale de Bassano, acanta Maria Teresa fiat abarrada pròpiu pro curare cussos sordados sardos chi in cussos annos de gherra aiant mustradu totu su coràgiu e sa fieresa issoro.

Maria Teresa, sa Madrina de Gherra si fiat afetzionadu semper de prus a sos “sardos”, generosa e donosa comente semper de donos, de bonos cussìgios e de paràulas de cunfortu. Fintzas cando sa gherra fiat finida Maria Teresa Nardini no aiat interrùmpidu su ligàmine cun cuddos sordados e cun sa terra de Sardigna; difatis aiat sighidu a prestare servìtziu in sa nave asilu “Azuni” impinnada a dare assisèntzia a sos òrfanos de gherra e aiat cooperadu cun autoridade e famìlias de sos fantes mortos in sas operatziones de reconnoschimentu e pro sa chirca de sos sordados ispèrdidos in sos bacos fungudos de su fronte,  teatru de batallas e fintzas in sos campusantos de gherra de s’Altipiano de Asiago.

Aiat poderadu sos cuntatos, mancari cun medas dificutades, cun Emilio Lussu durante s’esìliu in Frantza. Su matessi Lussu e Alfredo Graziani l’ammentant cun amore e reconnoschèntzia in sos libros issoro Un anno nell’Altopiano e Fanterie Sarde. Medas annos a pustis , semus in su 1945, Emilio Lussu, Ministru de s’Assistèntzia post bèllica de su primu guvernu de unidade natzionale, presente a Bassano pro ammentare s’istragu de sete partigianos massacrados  a Pessano dae sos tedescos e dae sos fascistas de sa Repùbblica de Salò,  no aiat mancadu de adobiare a Maria Teresa , sa “Madrina” de sos sassarinos, chi in cussos annos terrorosos de gherra aiat donadu cunfortu e agiudu a sos sardos e chi in medas ocasionse aiat istrintu sa manu a medas fantes muribundos prima de s’ora de sa morte.

Su cunsideru chi faghet a fàghere oe est chi, fintzas in momentos terrorosos, sunt possìbiles atos de solidariedade umana chi Maria Teresa Nardini at ischidu testimoniare in manera magnìfica. Àtera cosa chi tocat a nàrrere però, est ca sas gherras non sunt mai s’esitu naturale de eventos istòricos, ma su resurtadu de detzisiones e atziones chi generales e politicos leant a coro ligeri, pro ite in sas tritzeas non bi andant sos fìgios de sos chi cumandant, ma sos fìgios de sos pòberos.