Imprentas 211 di Ivan Marongiu

Dae su 16 de làmpadas a su 12 de cabudanni, in s’EXMA de Casteddu est aberta a su pùblicu “Wonderlands – la ricerca e la meraviglia”, sa primu mustra antològica dedicada a s’artista Giorgio Casu. Sa mustra, curada dae Simona Campus, esponet òperas chi contant s’atividade polièdrica, dae su muralismu a sa gràfica, dae sa pintura a su design, de s’artista de Santu Gavinu.

Giorgio Casu, in arte Jorghe, est un’artista chi  pro degheoto annos  at giradu totu su mudu, bivende in Austràlia, in su Sud Est asiàticu, in sos Istados Unidos de Amèrica, in Mèssicu. In Sardigna est connotu mescamente pro su traballu suo de muralista, gràtzias a su cale collàborat cun àteros artistas de livellu internatzionale. S’espositzione proponet una  seletzione manna de òperas, cunsentende a sos visitadores de connòschere sos diferentes nùcleos temàticos e istilìsticos de su percursu artìsticu de Casu, dae sos Elephant Eggs de s’installatzione initziale, chi introduint su cuntzetu de sa potèntzia immaginìfica de s’arte, a su corpus de sas pinturas de su Magic Realism, cun colores, formas e sìmbulos ispirados a diferentes culturas. S’allestimentu est a in curu de Salvatore Campus. Sa mustra ammaniada in sa Sala delle Volte s’at a isvilupare de prus in sas chidas imbenientes, interessende in su mese de trìulas fintzas sos ispàtzios esternos de s’EXMA: difatis, pro s’ocasione Giorgio Casu e s’iscuadra sua ant a dare vida a unu pintura murale, e a una sèrie de atziones artìsticas chi ant a motivare in manera direta su pùblicu.

Wonderlands at a èssere aberta a dae su martis a sa domìniga dae sas 9 a sas 13 e dae sas 16 a sas 20 cun intrada limitada (màssimu 15 visitadores a sa bia), in su respetu sas normas contra su Covid, prenotende in lìnia giai dae martis su 15 de làmpadas pro mesu de su ligàmine. Sa mustra est produida dae su Cunsòrtziu Camù, cun s’agiudu de sa Fundatzione de Sardigna, cun su patrotzìniu de su Comunu de Casteddu e su partenariadu de RadioX.

Giorgio Casu, in arte Jorghe, est un’artista polièdricu, difatis est fintzas animadore culturale, curadore de eventos chi curat in una dimensione colletiva e comunitària. Ma su talentu creativu e fecundu suo li cunsentit medas isperimentatziones non solu in s’àmbitu de su muralismu: sa chirca sua abbratzat diferentes suportos e materiales de sa pintura, cuntzepida in manera lìbera e aberta, chi s’acòpiat a sa gràfica e a su design. In unu mescuritzu continu de limbàgios, tècnicas e proportziones, a sos muros de sos edifìtzios alternat sa superfìtzie de sa tela, a sa tridimensionalidade de sos ogetos,  alternat s’immaterialidade de sas elaboratziones digitales.

Una produtzione polièdrica e vària, duncas, chi in prus de sos murales ispainados  unu pagu in totu sos continentes, est istada in parte esposta in medas gallerias de sa tzitade de New York. Ma sa cumplessidade e s’unitariedade de s’òpera sua  s’at a pòdere ammirare in Casteddu, chi cunfirmat s’impignu de s’EXMA a promòvere sas realidades prus interessantes de sa generatzione reghente artìstica isulana.

S’espositzione proponet una seletzione manna de òperas, chi permitint a sos visitadores de connòschere sos diferentes nùcleos temàticos e istilìsticos de su percursu artìsticu de Casu. Dae sos Elephant Eggs (sos oos de elefante, chi no esistent in natura) introduint su cuntzetu de sa potèntzia immaginìfica de s’arte de pòdere creare orizontes noos e plurales, s’arribbat a  sa Magic Realism, cun un’esplosione de colores, formas, sìmbulos ispirados a diferentes culturas. Sas imàgines de sos animales sunt espressione de sa contaminatzione de significados chi abbratzant Oriente e Otzidente, su Nord e su Sud de su pianeta, e sunt in su matessi tempus fortza vitale e energia.

Nde istupat a foras s’atitudine a sa chirca, a una esploratzione contina belle de etnògrafu, gràtzias a sas cales  s’artista lompet e unit realidades chi sunt a largu in s’ispàtziu e in su tempus: càpitat in custu modu chi sas bellesas de s’antiga tziviltade Maya adobient su repertòriu immaginàriu de sa Sardigna, acanta s’antigu si unit a su modernu.

S’espositzione sighit cun s’allestimentu de sos  pannellos espositivos fatos diretamente dae s’artista, a afortiare su sentidu de su ritmu e de armonia chi guvernat totu su progetu, comente in un’òpera de arte totale. Dae sos rafinados Àrbores de sa vida pigant forma sas figuras feminiles ricas e ammajadoreas, ispiradas a sa mitologia e a sa literadura, mariposas e colibrì si ponent lèbios subra sas fògias dae oro. Sighende sas orminas de Alice, chi a pustis de sa tana de conìlliu atraessat un’ispigru, s’arte de Giorgio Casu nos projetat in unu mundu imprevistu, sìmile a unu Paisu o a Medas Paisos de sas meravìllias. Unu mundu chi no ammitet istereòtipos o precuntzetos, acumpangende·nos a s’iscoberta de nois matessi e de sos àteros.

Naschidu in su 1975, a pustis de sa làurea in Iscièntzias de s’Educatzione a s’Universidade de sos Istùdios de Casteddu cun una tesi subra su potentziale educativu de sas artes visivas, Giorgio Casu at traballadu comente  educadore professionale pratichende arte-terapia cun adultos e pipios. Dae su 2002 at seberadu de si dedicare in manera costante a su traballu artìsticu e a s’esperièntzia de su biàgiu: a pustis de àere bìvidu in su Regnu Unidu, at sighidu unu percursu personale meda de aprofundimentu culturale in Austràlia, in su Sud-est asiàticu, in sos Istados Unidos e in Mèssicu. Comente amus naradu sas pinturas suas sunt istadas espostas mescamente in sas gallerias de sa tzitade de New York e in s’ocasione de eventos mannos. De rilievu s’espositzione in  sa Domo Bianca de Washington, in ue in su maju 2010 at presentadu su retratu de su Presidente Barack Obama. Pro sa segunda mustra sua acanta s’Atelier de New York, a tìtulu Lucid Dreaming, at collaboradu cun sa fotògrafa Layla Love de s’importante Domo Tiffany & Co. Su libru Lucid Dreaming, Harvest Season for the Soul est istadu presentadu in su 2011 dae sa galleria londinesa Eric Franck Fine Arts in s’AIPAD de sa fotografia, eventu organizadu in collaboratzione cun su MOMA, Museum of Modern Arte de New York.

In prus de èssere  pintore e muralista, Casu traballat comente interior e exteriors designer; est unu grandu isperimentadore de serigrafia, litografia e gràfica publitzitària. At prodùidu prendas, iscerpas in seta e chimonos, ma fintzas chiterras elètricas e tzeràmicas artìsticas. In su 2012 at fatu una mustra personale in s’elegante Salone Poltrona Frau in Soho. In sos Istados Unidos sighit a organizare eventos indipendentes e mustras. In Sardigna sighit s’impignu suo pro sa ricualificatzione urbana e territoriale pro mesu de s’arte, mescamente in Santu Gavinu e in Santu Antiogu. In sa bidda nadia sua est diretore artìsticu de sa manifestatzione “Non solo Murales”, pro sa cale curat cada annu sa realizatzione de murales in larga iscala, in collaboratzione cun artistas internatzionales.

Pro chie est interessadu a bisitare sa mustra antilògia sua in Casteddu, sos oràrios de abertura sunt a mangianu dae sas 9.00 a sas 13.00 e a merie dae sas 16.00 a sas 20.00 dae su martis a sa domìniga, cun intrada limitada in su respetu de sas mesuas anticovid, prenotende a su nùmeru 070 666399. Serradu su lunis.

Pro chie non connoschet Casteddu, s’Indiritzu de sa mustra est Via San Lucifero, 71.  Sas persones cun disabilidades motòrias podent lòmpere su tzentru cun sa lìnia dedicada de su CTM Amicobus (nùmero birde 800 259745). S’EXMA est atzessìbile in totu sos ispàtzios abertos a su pùblicu, inclùdidos sos servìtzios igiènicos e non presentat barrieras architetònicas. Billete ntreu: 5 € – reduidu: 3 € (over 65 e istudiantes), sos pipios finas a 7 annos e disàbiles non pagant.