di Ivan Marongiu
Òmines carbone: s’iscàmbiu mortale tra Itàlia e Bèlgiu
Su 23 de làmpadas de su 1946 benit firmadu in Roma su protocollu italo-belgu pro sa tràmuda de 50.000 minadores italianos in Bèlgiu. In càmbiu su guvernu belgu s’impinnaiat a bèndere a s’Itàlia unu mìnimu de 2.500 tonnelladas de carbone a su mese ogni 1.000 minadores immigrados.
Sa manodòpera non deviat tènnere prus de 35 annos e depiat èssere mandados 2.000 òmines a sa bia (unu càrrigu ogna chida). Su cuntratu previdiat 5 annos de miniera obrigatòrios. A càusa de un’errore umanu, s’8 de austu de su 1956 su Bèlgiu benit corpidu dae una tragèdia sena pretzedentes. Unu fogu allutu in unu de sos putzos de sa mina de carbon fòssile de Bois du Cazier, càusat sa morte de 262 persones de dòighi diversas natzionalidades: 136 sunt sos minadores italianos. Morint 262 persones. Sa seguridade de sos minadores fiat prus pagu importante de sos balàngios de sa sotziedade de gestione de s’impiantu, ca sos trastos de preventzione e de seguridade fiant cunsiderados unu costu tropu artu pro s’impresa.
“Un’ispetàculu orrorosu s’est presentadu a sos ogros nostros cando semus lòmpidos dae in antis a sos cantzellos de sa mina – contaiat Rubens Tedeschi in sas colunnas de L’Unità – Su fumu, unu fumu carcu, nieddu,- annieddigaiat su chelu e torraiat s’àera irrespiràbile. Dae su chelu iscuru ruiat unu prùere nieddu chi imburtaiat ogna cosa. De tretu in tretu, in mesu a su fumu, essiant pampas de fogu chi pariat de èssere in s’inferru. Una truma de fèminas e de pipios si fiat ammuntonada a inghìriu de sos cantzellos pro ischire calicuna noa dae sas iscuadras de sucursu. Sas informatziones però non fiant bonas. Tra sas mugeres de sos minadores b’aiat chie pranghiat, chie frastimaiat e chie abbarraiat a sa muda”.
Unu faeddu ebbia: inferru. Gasi aiat iscritu Gianluigi Bragantin in sas pàginas de su giornale Lavoro binti dies a pustis de su disacatu: “Sa majoria de sos minadores italianos de Marcinelle, comente sos de Charleroi e de Mons, de Testre e de sa Louvière, de Limburgo e de Liegi -at a pretzisare su responsàbile de sa Setzione imprenta e propaganda de sa Cgil – sunt militantes de sos partidos proletàrios e de sa Cgil. Medas de issos, prima de emigrare, ant lutadu in Itàlia, in sos bidditzolos issoro e in sas fàbricas issoro, in defensa de su traballu.
Sos bidditzolos, sos caminos, sas barracas in s’ierru sunt imboligadas dae unu pìgiu de nie ammescuradu a su prùere de crabone. Sos mineris colant dae sos 45 grados sutaterra a sos 35 suta zero de sa superfìtzie. Sas biddas a inghìriu de sa mina sunt unu mundu minore dae su cale sos minatore non essint mai: b’at s’ispaciu, su tzìnema, sa ferrovia, su postale e sos telefonos pro mutire a domo. Totu est de su mere. Si mancas una die de su traballu s’afitu de su mese ti benit aumentadu de su 50% in prus; si mancas duas dies ti benit raddopiadu. Si perdes una panga in sa miniera la deves pagare, si non cumprendes s’òrdine de unu responsàbile chi allegat in dialetu fiamingu pigas una multa e ses obrigadu a frecuentare sa cungregatzione religiosa de su logu pro imparare sa limba. Contra totu custu lutaiant sos minadores mortos a Marcinelle e contra totu custu ant a sighire a lutare sos cumpàngios issoro”.
In Bèlgiu b’aiat fintzas medas minadore sardos. Cando fiat acontèssida sa tragèdia de Bois du Cazier in medas fiant istados impinnados in su riprìstinu de sas gallerias. Medas de sos chi si fiant riunidos in cuddas oras e in sas dies sighentes in sa pratza de sa mina, beniant dae sas biddas e dae sos putzos a presu, cun sas mugeres, sos fìgios issoro. Lu contant in sas intervistas chi sunt sunt istadas collidada dae Simone Cireddu e Barbara Pinna in Barigadu, in Màrghine, Planargia e Mandrolisai, pro contu de s’assòtziu Paesaggio Gramsci. Calicunu de custos ex minadores sunt galu bios, ant prus de 90 annos, ma su prus sunt mortos pro more se sos intzidentes e de sa silicosi.
Sardos in sas minas de su Bèlgiu nde sunt mortos medas. Non si connoschent totu sos nùmenes, e mancu totu sos detzessos sunt istados registrados. Pro sos italianos sas istatìsticas ufitziales faeddant de 867 mortes dae su 1946 a su 1963, vìtimas diretas de fogos, franadas, iscòpios de gas, rùidas de ascensores. Essint dae custa contabilidade totus cuddos mortos a causa de sas maladias respitatòrias.
Dae su 1946 a su 1950 est comente chi non b’esserent istados intzidentes. Su numeru prus artu fiat istadu tocadu in su 1956, cun 51 mortes in prus de sas 262 de Marcinelle. Mòrrere a pustis de unu ricòveru in ispidale a pustis de un’intzidente in mina, cheriat nàrrere chi cudda morte non fiat atribuida a un’intzidente in su traballu. Unu giornalista bellunesu, Walter Basso, at publicadu unu libru cun sa lista de sos minadores italianos mortos chi allegat de totu cussas mortes chi non sunt mai intradas in su contègiu ufitziale.
In sas listas de Basso b’at fintzas medas sardos. Unu de custos est unu minadore de Sedilo, Salvatore Carta, mortu suta una pedra in galleria a pustis de Marcinelle, in su ghennàrgiu de su 1957, pagu a largu de Bois du Cazier, in Monceau Fontaines: si fiat ischidu de issu solu gràtzias a un’articuleddu de duas rigas essidu in L’Unità; fintzas sos parentes no ammentant, o non cherent ammentare.
Marcinelle fiat istada una die simbulu in s’esperièntzia migratòria in Bèlgiu mescamente de sos italianos. Dae tando fiant cambiadas sas polìticas de sa seguridade in su traballu, fiat cambiada sa pertzetzione de sos italianos dae banda de sos belgas. Fiat bènnidu postu su faeddu fine a su patu de su 1946 chi iscambiaiat cada operaju cun tonnelladas de carbone a s’annu.
Fiat cumintzada una difìtzile integratzione pro sos chi sunt abarrados (sunt prus a mancu 30.000 sos sardos oe residentes in Bèlgiu), mancari s’istòrica prus autorèvole in sa matèria de sas migratziones in Europa, Anne Morelli, de s’Universidade de Bruxelles, narat: «De sa prena tzitadinàntzia europea chi puru sos italianos ant fatu de totu pro costruire, non b’at sinnu. A dolu mannu, oe etotu sunt medas sos italianos espèllidos cada annu dae su Bèlgiu, pro “mancàntzia de mèdios econòmicos”. Est una batalla chi sos sindacados sunt cumbarende pro fàghere connòschere custa realidade e gherrare contra custas espulsiones».
Nde sunt torrados medas, in Sardigna, in sas biddas chi aiant lassadu in sos primos deghènnios su segundu pustisgherra. Sos prus sunt de Samugheu, Ardaule, Thiniscole, Sindia chi ant lassadu fìgios e nebodes in Bèlgiu. Medas ant sintonizadu sa televisione in sos canales belgos, pro s’ammentare de s’aventura umana issoro. In Bèlgiu, in ocasione de su 70° anniversàriu de sos acòrdios pro s’emigratzione italiana, est istadu presentadu unu film chi podimus definire opera mastra de su neorealismu, “Già vola il fiore magro”, de Paul Meyer, chi at pro protagonistas una famìlia de sardos e àteros emigrados de Sindia, Samugheu, Ardaule, Tzaramonte. Pro cussa ocasione fiat istadu presentadu fintzas su libru de Paolo Di Stefano, autore de La catastrofe, (essidu cun Sellerio in 2011) subra sa tragèdia de cuddu 8 de austu.
Dae pagu Di Stefano, in un’articulu de Il Corriere at allegadu de su chi restat in sa memòria de sos giòvanos, de s’emigratzione in Bèlgiu, de s’intzidente de Marcinelle. Non solu sos giòvanos. Est comente chi si cherreret iscarèssere un’ammentu chi non s’acapiat prus a sa narratzione chi italianos e sardos cherent fàghere de issos etotu.
Imbetzes, narat Simone Cireddu, a s’acabbu de sa prima longa sèrias de intervistas: est pretzisu chi sos betzos minadores content e faghere ischire a sos giovanos ite est istada s’emigratzione de sos sardos in Belgiu. Ischire e connoschere su tempus coladu nostru serbit fintzas a tènnere un’ategiamentu diferente in sos cunfrontos de sos migrantes noos chi lompent in Italia dae àteros logos, pròpiu comente faghiant sos italianos e sighent a fàghere sos sardos chi pro motivu de traballu detzident de lassare sa Sardigna.