di Ivan Marongiu

Start Cup Sardegna! Abertas sas iscritziones a su prèmiu pro startup sardas

Su 19 de trìulas, in sos canales e retes sotziales de Innois, StartupItalia, Universidade de Casteddu e de Tàtari est andadu in direta s’eventu de làntziu de Start Cup Sardegna.

Sas Universidades de sos Istùdios de Tàtari e Casteddu, paris cun  Innois, difatis, sunt sas promotoras de sa Start Cup Sardegna, su prèmiu finalizadu a fàghere iscobèrrere sas mègius ideas de impresa innovativas de su territòriu. In pàliu b’at unu monteprèmiu uguale a 25.000 èuros destinadu a sustentare sa chirca e s’innovatzione tecnològica pro mesu  de sa creatzione de iscuadras interdisciplinàrias pro s’isvilupu econòmicu de sa Regione Sardigna, chi dae su 2008 partètzipat a Start Cup.

A s’eventu Start Cup Sardegna, moderadu dae sa vitze diretora de StartupItalia, Chiara Trombetta, ant  partetzipadu Fabrizio Pilo, proretore delegadu pro su Territòriu e s’Innovatzione de s’Universidade de Casteddu; Carlo Mannoni, diretore generale de Fundatzione de Sardigna; Alessio Tola, delegadu de su Retore pro su Trasferimentu tecnològicu e sas relatziones cun sas impresas; Milena Leoni, fundadora de  LinkAbili, startup chi aiat bintu s’editzione colada de Start Cup Sardegna; Giulia Guadalupi CEO de Bacfarm; Andrea Ballabio, CEO e co-fundadore de Eye4nir e Andrea Ancona, cofundadore e CEO de U-Caras Medical.

Sa Start Cup est dedicada  a sugetos, istudiantes, ricercadores internos o esternos a s’Universidade chi tenent ideas impresariales de tipu innovativu in diversos setores econòmicos e chi aspirant a isvilupare unu progetu de impresa innovativa in su territòriu regionale. Mescamente, podent partetzipare a su prèmiu iscuadras de a su mancu duos cumponentes e impresas in forma de sotziedade chi non si siant costituidas prima de su 1° ghennàrgiu 2021 o in su cursu de su 2020 ma chi non siant galu ativas o cun decraratzione de cumintzu de atividade sutzessiva a su 1° de ghennàrgiu 2021. Pro partetzipare, est netzessàriu propònnere un’idea innovativa de isvilupu impresariale, cun preferèntzia basada subra sa chirca, in manera indipendente dae s’istàdiu de isvilupu suo, in sos setores sighentes:

Industriale, cun produtos e/o servìtzios innovativos, dae su puntu de vista de sa tecnologia o de su mercadu, pro sa produtzione industriale;

Life Science – Med Tech, cun produtos e/o servìtzios innovativos pro megiorare sa salude, su benèssere e sa calidade de vida de sas persones;

ICT, in s’àmbitu de sas tecnologias de s’informatzione e de sos mèdios de comunicatzione noos comente  e-commerce, retes sotziales, mòbile, gaming, etc;

Cleantech & Energy, cun servìtzios innovativos orientados a su megioramentu de sa sostenibilidade ambientale in sos campos de sa produtzione agrìcula, de sa tutela de s’ambiente e de sa gestione de s’energia.

Sas iscuadras non podent partetzipare cun sas matessi ideas presentadas in sas pretzedentes editziones de Start Cup o in àteros cuncursos aderentes a su PNI.

Cun s’obietivu de favorire sa cultura de impresa in su territòriu e acumpangiare a sa nàschida de aziendas a artu connoschimentu, favorende sa contaminatzione e s’interdisciplinariedade, Start Cup Sardigna at  a seletzionare 10 startup prus meritèvoles chi ant a pigare parte a su percursu intensivu (full week) pro s’isvilupu de sos business plan in cabudanni. Custu s’at a fàghere a s’internu de s’incubadore Cubact de s’Universidade de sos Istùdios de Tàtari o, in alternativa, si sas cunditziones sanitàrias no l’ant a permìtere, dae remotu comente s’annu coladu.

Sa finale de Start Cup Sardegna est prevìdida pro su 28 de santugaine: die durante sa cale sos progetos finalistas ant a dèvere espònnere unu prospetu de s’idea pròpia de business de sa durada màssima de 4 minutos. Sos binchidores ant a èssere sas tres iscuadras chi ant a otènnere sa votatzione prus arta tra sa mèdia de sos votos de su Comitadu Tècnicu-Sientìficu e de sa Giuria Allargada, formada dae unu màssimu de 40 espertos individuados tra istudiosos, professionistas, funtzionàrios o dirigentes de sa pùblica amministratzione impinnados in progetos de sustegnu a s’imprenditorialidade, imprendidores, rapresentantes de istitutziones finantziàrias ativas in s’isvilupu de impresas noas, fundatziones bancàrias, espertos sientìficos in sas àreas a arta tecnologia o connoschimentu chi apartenent a sos entes proponentes, istitutziones e imprendidores locales. Ant a èssere premiadas sas iscuadras chi, in modu particolare, s’ant  distìnghere pro: balore tecnològicu e  connoschimentu; realizabilidade de s’idea; potentzialidade de isvilupu; adeguadesa de sas cumpetèntzias de su management de iscuadra; atratividade de su mercadu de riferimentu; calidade e cumpletesa de sa documentatzione.

A sa valutatzione at a sighire s’assegnatzione de sos prèmios. In prus b’at a èssere sa possibilidade, pro totu sos partetzipantes, de pòdere pigare parte a percursos de aprendimentu a s’autoimprenditorialidade e addòbios pro sa divulgatzione de sa cultura impresariale. Sos tres grupos binchidores de Start Cup Sardegna ant a partetzipare, posca, a su Prèmiu Natzionale pro s’Innovatzione 2021 chi s’at a fàghere in Roma tra s’agabbu de santandria e sos primos de nadale.

“Start Cup Sardegna est pro s’Universidade de Tàtari unu momentu importante meda pro contribuire a s’isvilupu de sas ideas innovativas chi podent devènnere atividades de impresa.  – at decraradu Alessio Tola, delegadu de su Retore pro su Trasferimentu tecnològicu e sas relatziones cun sas impresas – S’Universidade de Tàtari creet in sos giòvanos suos, in sa capatzidade issoro de rinnovare in manera sustenìbile proponende produtos, protzessos a mercados semper prus cumplessos ma comente si siat prontos a acollire e a dare balore a sos sugetos chi siant a tretu de intertzetare sas àndalas de s’isvilupu. Cun custu ispìritu, s’universidade cheret sustentare initziativas chi potzant torrare a sos imprendidores de cras su sentidu de unu mix tra creatividade, atuamentu, innovatzione, cumpetèntzias e abnegatzione pro su traballu“.

Su prèmiu est isponsorizadu dae Sardegna Ricerche, Bancu de Sardigna, Fundatzione de Sardigna, Legacoop Sardigna, Abinsula e Numera. Sas mègius tres ideas imprenditoriales ant a tènnere sa possibilidade de partetzipare a su Prèmiu Natzionale pro s’Innovatzione 2021.“Sa Fundatzione de Sardigna est impinnada dae semper in s’amparu de sas Universidades sardas e de sa chirca, cun un’ogru de riguardu a s’innovatzione. In sos ùrtimos 10 annos sunt istados dados prus de 40 milliones de èuros in favore de sa chirca e 28 milliones sunt cuddos investidos in “venture capital”– at afirmadu Carlo Mannoni, diretore generale de Fundatzione de Sardigna – Cun su progetu Innois custu agiudu no est prus solu de natura finantziària ma fintzas istrumentale, promovende sa collaboratzione tra sos sugetos istitutzionales e tra su setore pùblicu e cussu privadu. Cun Start Cup Sardegna cherimus contribuire a sustentare sa cultura de s’innovatzione e de s’imprenditorialidade tra sos giòvanos nostros”.

S’annu coladu a bìnchere est istada s’idea de impresa Linkabili, unu digital marketplace chi oferit assistèntzia e orientamentu a sas persones cun disabilidades. A su segundu postu, s’innovatzione in odontoiatria de BFix chi si proponet de diretzionare sa crèschida òssea gràtzias a s’idrossiapatite magnètica: unu biomateriale innovativu, brevetadu ma naturalmente presente in s’ossu umanu, chi s’ìntegrat in s’ossu comente una normale molècula. A su  de tres postos est arribbada sa  TBond Multilink, una startup innovativa chi coprit  sas zonas sena banda larga pro mesu de unu produtu chi faghet “ponte” cun sos aparatos de trasmissione de sos datos.