di Ivan Marongiu

Sa startup chi agiuat sos betzos: su bandu bintu dae 4 pitzocos de Otzana e Bolòtana

Pompiare in intro de sa realidade pro nde lèghere sos bisòngios, agatare sas crititzidades e propònnere solutziones innovativas, chi siat a tretu de influire subra su megioramentu de unu sistema chi dae un’annu e mesu si cunfrontat cun sos efetos de sa pandemia de Coronavirus. A totu custu abbaidant Fabio Deriu, Davide Pinna, Davide Basolu e Bassem Oreste Angioi, sos bator giòvanos imbentores de Hease Life, su progetu imprenditoriale seletzionadu dae su bandu Medst@rts, una de sas articulatziones de su programa de cooperatzione Eni Cbc Med chi persighit s’obietivu de sa creatzione de oportunidades econòmicas noas in s’àrea de su Mediterràneu. S’àmbitu de aplicatzione progetuale est sa de s’assistèntzia sanitària, mescamente cussa oferta dae sas Rsa chi acasàgiant categorias fràgiles meda de sa populatzione.

S’idea premiada arribbat dae su tzentru de sa Sardigna, dae un’iscuadra formada dae tres pitzocos de Otzana e unu de Bolòtana, sos duos tzentros destinados a cumpartzire sa geolocalizatzione in un’àrea de crisi, acanta su fallimentu industriale est devènnidu un’elementu endèmicu e in ue torrare a pensare s’isvilupu cun paradigmas noos est mescamente una netzessidade. Si s’innovatzione est su trastu a disponimentu pro bìvere mègius su presente e pro costruire su futuru, sunt  pròpiu sas medas aplicatziones suas a abèrrere su caminu a fòrmulas prus efitzientes de organizatzione e otimizatzione de sos sistemas, e in prus a mercados noos e a ocasiones noas de impresa. Unu cuntzetu chi sos imbentores de Hease Life ant aprofundidu meda, bidu chi  sa base de s’initziativa est unu produtu giai connotu e presente in su mercadu, de adatare però a impreos ispetzìficos noos e alternativos. S’idea naschet dae sa netzessidade de modernizatzione e efitzientamentu de su sistema de assistèntzia sanitària, e sa proposta est cussa de s’adotzione, in sas Rsa, de un’aparatu non invadente de tènnere in su burtzu, cuntzepidu pro controllare in manera costante e continuativa sos paràmetros vitales de chie lu giughet. Unu bratzaleddu chi podet trasmìtere in tempus reale sos paràmetros printzipales rechestos – comente pro esempru bàtidu cardìacu, temperadura de su corpus e pressione sanguìnea – a un’apòsita prataforma pensada prima de totu comente un’interfàtzia de supervisione pro su personale sanitàriu, su cale diat èssere postu in sas cunditziones otimales pro controllare s’istadu de salude de sos malàidos in cale si siat momentu, regollende fintzas s’istòricu de sos datos chi diant pòdere semper serbire.

«Sas mesuras benint fatas tràmite unu device wearable a su cale amus dadu su nùmene de Lala. Nos praghet pensare chi ogni cliente nostru si potzat intèndere a su seguru gràtzias a Lala de Hease Life» – at naradu dae Bolòtana a su gironale La Nuova Sardegna  Fabio Deriu, como impinnadu paris cun sos otanesos Pinna, Basolu e Angioi in su passàgiu detzisivu de s’idea progetuale a sa costitutzione de impresa. «S’idea movet dae una netzessidade comuna a totus nois: sa de ischire comente  istat unu caru nostru. Unu bisòngiu chi est essidu a campu in modu drammàticu cando s’ispàinu de su Covid nos at custrintos a s’acorru e sas istruturas pro betzos sunt istadas serradas a sos bisitadores, ponende in evidèntzia su bisòngiu de sistemas de controllu e de  preventzione pro sa salude. Non pro nudda – sutalìniat Deriu – unu puntu importante de su progetu interessat sa possibilidade de rèndere disponìbiles sas informatziones subra sas cunditziones generales de salude de s’assistidu de sa Rsa fintzas a sos parentes, semper pro mesu de sa prataforma, gàtzias a un’account òspite». Si pro s’ora  sa sotziedade puntat a sas istruturas chi òperant in àmbitu sanitàriu, s’iscuadra no escludet de puntare fintzas a su mercadu de sos consumadores sìngulos.

Semper in tema de start up, custa bia acapiadas a su digitale, importante meda est s’atividade de Open Campus, un’azienda nàschida in su 2013 dae  unparticulatzione Tiscali e devènnida unu laboratòriu de innovatzione indipendente. «Naschimus comente azienda collaterale de Tiscali – at naradu Alice Soru, 41 annos, Ceo de Open Campus –. A s’època fia dipendente e fiat giai comintzadu su fenòmenu de su coworking. Amus mòvidu cun un’ispàtziu pro agèntzias minores e free lance». Unu laboratòriu abertu a contaminatziones e iscàmbiu de ideas ma fintzas logu pro istudiare su «traballu e sos cambiamentos suos». Posca sa crèschida e sa fundatzione de s’azienda chi oe est formada dae sete persones.

«Semus semper istados un’osservatòriu privilegiadu subra su mundu de su traballu e subra de sos cambiamentos suos – at agiuntu Alice –. In sos annos amus bidu free lance, startup, aziendas mannas e minores de su digitale traballare in sos ispàtzios nostros, amus imparadu a connòschere sas bisòngios issoro e amus bidu cambiare sas abitùdines issoro. Oe sa community nostra est pobulendesi de traballadores de remotu, bènnidos dae medas partes de Itàlia e de Europa, chi ant seberadu de torrare o de si trasferire in Sardigna». In sos ispàtzios mannos de Sa Illeta, in Casteddu, acanta Open Campus tenet sa base sua, su partner printzipale est Tiscali, ma s’azienda impreat  sos ispàtzios gràtzias a unu cuntratu de afitu, in mesu a prados birdes, olias e matas  mediterraneas, e una bista ispantosa cara a su mare e a  sa tzitade de Casteddu. «Traballamus cun realidade comente  Sanofi Genzyme, Spindox, Tiscali, Engineering, Fundatzione de Sardigna, Agèntzia sarda pro sas polìticas ativas de su traballu, Crs4 e Medsea Mediterranean Sea and Coast Foundation – sighit a contare Alice –, agiudende·las a agatare istrategias de isvilupu digitale noas e ponende·las in cuntatu cun giòvanos talentos e startup pro mesu de hackathon, startup competition e eventos fatos a mesura».

E posca b’at sa formatzione pro aziendas e professionistas, masterclass e workshop totus dae remotu. Dae su 2020 Open Campus est fintzas agèntzia formativa acreditada dae sa Regione Sardigna e at aviadu unu percursu de digitalizatzione de s’oferta formativa. Tra sos progetos cussu pro sos dipendentes de Tiscali e sos dirigentes iscolàsticos e insegnantes. Pro su benidore  b’at sa prataforma de e-learning. A su cumintzu de s’annu, Open Campus at promòvidu  cursos pro privados divididos in duos format: su Bootcamp (5 apuntamentos) e sos Digital Friday. In programa apuntamentos  dedicados a LinkedIn e a sa progetatzione de eventos virtuales e ìbridos.

Pro serrare s’aprofundiemntu de oe totu dedicadu a sas start up, allegamus de su Summer camp Silicon Valley. Si tratat de 10 dies de formatzione chi sunt istada fata in Tortolì su mese coladu.  – Promòvidu dae sa Fundatzione Its Blue Zonas, s’Ipsar de Tortolì, sa Provìntzia de Nùgoro, sa Càmera de Cummèrtziu, su Cunsòrtziu Universitàriu de su Nugoresu, Iefca, Federterziario, Opificio Rinnova – a sas atividades ant leadu parte 15 dischentes aspirantes imprendidores. A fàghere sas letziones in sa sede de su Cunsòrtziu Industriale, sunt istados duos espertos importantes de start up bènnidos dae sa Silicon Valley, Gideon Marks e Chris Burry: su primu mente de Google, su segundu cun esperièntzia de 30 annos in su campu de sas startup.

A sa fine de sas letziones bi sunt istadas reatziones positivas dae banda de sos dischentes. “Trasferire sas esperièntzias e sas connoschèntzias antigas de ognunu de nois a sas generatziones noas ativende sa prima ‘Iscola de sas traditziones sardas’ est su bisu meu – at naradu Jessica Fadda maistra de 32 annos de Tortolì -: unu logu in ue si cunservat e si trasmitet sa connoschèntzia orale, a cumentzare dae cussa de sas retzetas,”. Daniela Langiu 26 annos de Ulìana, tenet un’idea pro sas butegas artigianas minores: “Recuperare sas raighinas, pro mesu de un’app chi permitet de ordinare sos produtos prus a sa lestra fintzas in sa butega suta de domo. Su Summer Camp m’at insegnadu  comente  istruturare un’azienda e comente la pònnere a sa ritza”,  at cummentadu. “Su progetu meu est Passaparola Job, unu cuntenidore prenu de professionistas chi ghetat unu ponte tra su mundu de sa formatzione professionale e su mundu de su traballu. Partetzipare a custu camp m’at agiuadu a mi cuntzentrare mègius subra unos cantos obietivos chi faghent crèschere su progetu meu”, ispiegat Valeria Fois 25 annos.