di Ivan Marongiu

Sa vida difìtzile de sos amministradores locales in sa Sardigna de s’Otighentos

B’at unu riu de sàmbene longu belle unu sèculu chi caraterizat s’istòria amministrativa de sa Sardigna de s’Otighentos. Unu sèculu acanta sa figura de su sìndigu fiat diferente meda dae cudda de oe. Numenados dae s’intendente o eletos dae pagos “òmines de cabbale”, a pustis de sa reforma de s’Istatutu albertinu, sos sìndigos aiant medas poderes. Oteniant custa càrriga sos chi aparteniat a sa burghesia minore o professionistas comente  mèdicos, notàrios, insegnantes e abogados. Pro custu sos motivos de sas atziones violentas chi aiant corfidu medas sìndigos andant chircadas prus che ttou in sa positzione sotziale issoro. In s’Otighentos e in sos primos annos de su Noighentos, sa probabilidade chi unu sìndigu in càrriga de non si mòrrere in su letu suo, pro unu motivu o pro un’àteru, fiat arta meda.

Fintzas oe amministrare sos comunos minores de su tzentu Sardigna no est  unu giogu. Ma calicunu lu depet fàghere, pro ite  s’alternativa est s’arribbu de unu cummissàriu de nòmina prefetìtzia. Su sìndigu est galu su rapresentante de sas istitutziones istatales, chi sunt semper tropu a tesu dae su territòriu e surdas a sas chèscias de sos tzitadinos. De cunsighèntzia issu est su primu a collire sas lamentelas e a ascurtare sos problemas de sos tzitadinos. Sutzedet però chi sas crìticas a bortas si trasforment  in meletzos e fintzas in beros atentados contra sa persone de su sìndigu e a sa seguridade de sa famìlia sua. Sas crònacas isolanas de sos ùrtimos setanta annos faeddant craru.

Però, tra su 1816 e su 1912 sa situatzione fiat meda prus grae. Sa figura de su sìndigu in sa Sardigna preunitària aiat sa dòpia funtzione de capu de s’amministratzione comunale e de agente de guvernu. In s’Itàlia liberale si fiat agiunta una tertza funtzione chi no aiat caràtere istitutzionale ma polìticu, sa de “mannu eletore“, est a nàrrere cussu chi gràtzias a sa positzione sua de cumandu e pro mesu de s’operadu suo podiat resurtare detzisivu pro s’eletzione de unu deputadu. Apartenende a famìlias de  possidentes mannos, in un’època in ue sa propiedade e sos capitales fiant in sas manos de pagos, a s’ispissu un’òmine ebbia o una sola famìlia podiant dispònnere de chentinas de votos e de su pòdere de los dare a su candidadu preferidu.

Su sìndigu – mannu eletore, subra su cale si cuntzentraiant sos isperos de sos deputados, podiat contare semper in una rete parentale, s’ereu, est a nàrrere unu tzertu nùmeru de famìlias unidas dae  vìnculos de sàmbene, ma fintzas dae interessos comunos o fintzas de bonu bighinadu. Podiat sutzèdere fintzas chi custas famìlias o ereos rivales pro chistiones de polìtica e interessos locales s’agatarent unidos pro donare su votu issoro a su candidadu de turnu. Faghiat parte de unu giogu de echilìbriu in s’esertzìtziu de su pòdere e pro tutelare  sos interessos issoro e de su deputadu. Tocat a ammentare chi a in antis de sa reforma de sa lege eletorale de su 1913, sa pertzentuale mèdia de sos ammìtidos a su votu fiat bassa meda, agigu su 9% in su 1891.

In custa situatzione, in ue sas famìlias nòbiles locales aiant totu s’interessu issoro a nche istichire unu cumponente issoro a sa ghia de su comunu, in sa persone de su sìndigu si cuntzentraiant una sèrie de poderes chi baliant a s’internu e a s’esternu de sa comunidade. Pro custu su primu tzitadinu, sa famìlia sua e su segretàriu, fiant sos ùnicos responsàbiles de s’operadu issoro e de cunsighèntzia su sìndigu fiat su bersàlliu de chie fiat contràriu a sa polìtica sua. Fintzas a s’època s’impreaiat sa minetza, sa vituperia, su dannu, lìteras anònimas e a s’ispissu sa bravura puru. Cando totu custu non bastaiat su sìndigu podiat èssere fintzas mortu a balla.

Sos primos sìndigos a mòrrere suta de su fogu de sos inimigos fiant istados Giuseppe Antonio Peru de Agius, in su 1816 e Costantino Camedda de Garteddi, in su 1817. In su cabudanni de su 1825 Antonio Mura Arru, sìndigu de Cossoine, si l’aiat sarbada dae sas fusiladas de su satzerdote Filippo Nurra, chi fiat de acòrdiu cun sos frades Salvatore e Antonio Nurra. No aiat tentu imbetzes sa matessi fortuna su sìndigu de Santa Teresa de Gaddura, Francesco Comité, assassinadu dae una fusilada a  in su sartu de Porto Pozzo in su martzu de su 1826.

Su 28 de freàrgiu de su 1853 fiat istadu mortu Vittorio Piras, sìndigu de Sant’Andria Frius. S’annu sighente in  Agius benit mortu su sìndigu Giuseppe Andrea Peru. Mègius fiat andada a su sìndigu de Armùngia, Antonio Carboni e a su de Serrenti Giovanni Saiu, chi si l’aiant sarbada su primu in su 1858 e su segundu in su 1862.

Su 7 ghennàrgiu de su 1869 benit mortu Simone Sanna de Pasada. Su 7 de abrile de su 1876 fiat tocadu a sìndigu de Ortzai Giovanni Maria Mameli.

In sos annos Otanta benint mortos sos primos tzitadinos de Foghesu, Orgòsolo e Orune. Sa morte de Efisio Arbau, sìndigu de Ollolai, su 4 maju 1891 aiat inauguradu s’istragu de àteros chimbe sìndigos sardos: in su 1892 Rocco Vaquer, sìndigu de Bidda Sorris; su 14 de abrile de su 1896 Giovanni Maria Serra sìndigu de Turalva; in su 1898, Santino Laconi de Ulassa, Antonio Luigi Corda de Alà e Giovanni Vincenzo Atzori de Norghiddu (Norbello).

In Samugheu, su sìndigu Don Stefano Sedda aiat retzidu meletzos pro si dimìtere: bestiàmene mortu,  dannos a sas propiedades e gosi sighende. Ma isse fiat abarradu a su postu suo. Tando sos nimigos l’aiant postu una càrriga de dinamite in domo. A sa fine si nde fiat essidu de sìndigu e aiat fintzas lassadu sa bidda.

Sos atentados contra sos sìndigos fiant sighidos  in su sèculu nou puru. Su 27 freàrgiu de su 1906, martis de carrasegare, in Vitzi, durante sos ballos in pratza, un’òmine infatzoladu aiat isparadu a su giòvanu sìndigu eletu dae duos annos ebbia, su farmacista Angelo Mossa Naitana. In su 1909 si contat un’àteru sìndigu mortu fintzas in su Sulcis. Su 23 de martzu, difatis, in Santadi fiat istadu agatadu mortu in sa propiedade sua de  S’Arcu de Cambudu, su primu tzitadinu Antioco Tadaja.

S’annu peus però fiat istadu su 1910. Su 27 ghennàrgiu morit  su sìndigu de Ortueri Sebastiano Musu. S’8 de maju in Nule su latitante de Orune, Raimondo Calvisi, ochit a su sìndigu Francesco Masala. Su 16 de austu, duos fusiladas aiant mortu a Pietro Massaiu, sìndigu de Orune. In fines, su 13 de nadale, durante una bardana chi aiat pigadu de mira sa bidda de Sisini fiat  abarradu mortu dae sos rapinadores unu de sos propietàrios terrieros prus ricos de sa Trexenta, su sìndigu Francesco Aresu.

Fintzas su 1911 aiat àpidu sa vìtima sua. Su sìndigu de Agius, Anton Pietro Spezzigu nòdidu “Cosciganu” fiat istadu  assassinadu su 10 de trìulas in sa localidade Sa Ciacca, a unu chilòmetru de su tzentru abitadu. Matessi sorte pro su sìndigu de Brevìe (Belvì) Salvatore Pruneddu torrende dae su sartu cun sa mugere Raffaela Marotto, corfidu a su coro cun una fusilada su 5 de santugaine de su 1912. Pro sa morte fiat istadu imputadu su cumpaesanu Nicolò Mura chi  su matessi annu fiat istadu denuntziadu dae su sìndigu. A pustis de s’omitzidiu de su sìndigu Mura at a andare a bandidare, ma at a èssere mortu dae sos carabineris in Aritzu.

Dae su 1913  sas cosas ant a cambiare de su totu. S’introdutzione de su votu universale pro sos òmines e sa nàschida de partidos sotzialistas e catòlicos, nd’aiant leadu su podere a sa borghesia e a sa nobiltade locale. In su primu pustisgherra a sa figura de su sìndigu podiant aspirare fintzas sos esponentes de sas classes populares. Dae tandos sos omitzìdios de sos sìndigos ant a cabbare e ant ant èssere unu regordu ebbia. Cussa undada longa de sàmbene e violèntzia però aiat causadu da morte de 24 primos tzitadinos.