di Francesco Oggianu

Villa Chiara in tottue pro ennere incontru a sos sufferentes

Est una bell’istoria cussa de Villa Chiara, in Terranoa, un’istruttira chi accollidi sos malaidos e zente, omines e femminnas, ma fintzas pitzinnos, che tenede sa nezzessidade de assistenzia in d’onzi manera. E est zente chi non tened mancu parentes e chi non poded mancu essere assistidos si non est in d’unu centru ispecializzadu, chi peroe medas personas non si podene pirmittere. Vila Chira est unu postu diversu, ca s’istoria da custu centru naschede in d’unu logu sacru, inbe dae annos si sighid andare in pellegrinaggiu, paris cun s’Oftal (sìassociazione de volontariadu cresiastica, chi regolled malaiodos e sufferentes de sa Sardigna intrea) Custo loogu est Lourdes, chi tened sa capacidade di ponnere paris e mudare su dolore e sa sufferenzia in d’unu profundu ligamine de amicizia. Est bistada propriu s’amicia tra Juanne, chi est su presidente de sa Fundassione Villa Chiara Onlus e Tore, macumeresu de naschida, presidente de s’associassione Amigos de Villa Chiara e presidente regionale de sìOftal, chi han decisu de trasformare su disizzu de Chiara, sa muzzere de Juanne, chi fid gravemente malaida, in sa costruzione de unu logu inube agatare unu sustegnu e cundivisione mancari bi essere in mesu sa maladia.

E gai est bistadu. A pustis chi est morta Chiara, a distanza de pagu tempus, si est costiduida sa fundassione Villa Chiara onlus, impinnada in sa costruzione de una domo manna de accoglienza pro sos disabiles. Est bistadu fattu meda in termines de volontariadu pro fraigare cussa istruttura, chi est diventada un’esempiu in tottu sa Sardigna e fotzis in tottu s’Italia, chi come medas cherene copiare. Est naschida goi un’amicizia tra personas che cominzana a si leare a coro su bisonzu de sos atteros e chi partecipana a su dolore de chie suffridi. Grassias a custu azzudu de tottus, Villa Chiara rappresentada non solu s’istruttura, ma est fintzas unu sinnu de caridade chi diventad cultura, espressione de una civiltdade basada subra de s’amore pro sa persona, chi diventada unu gestu cuncretu de omines chi incontrana su bisonzu de sos atteros e non si limitana a ofrire solu unu serviziu, ma una realtade inube si azzuada a jughere su dolore e sa maladia in d’una cundissione chi est de onzi die. Podimus narrere chi Lourdes, mancari abbarrede attesu, abbarrada sa sede bera de s’istoria de Villa Chiara, subra sa protezione de sa Santa Vergine Maria, chi a sos volontarios chi gestini Villa Chiara, resessidi a mudare sos limites de tottus e sa fragilidade umana in d’unu bene prus mannu pro tottus.

Villa Chiara, mancari che siad in Terranoa, fatta naschere in d’unu terrinu regaladu dae su Comune, non est aberta solu pro sos malaiodos de sa Gaddura, ma est aberta pro tottu cussos giovanos sardos chi arrivana dae d’onzi logui de s’isula nostra, fintzas dae Casteddu, dae Macumere, dae sa Pianarza, da Tathari, dae Nugoro, dae s’Ozzastra. Malaiod e sufferentes cun medas disabilidaes, benini accollidos in cussu logu inube s’amicizia est una cosa sacra. In cussu logu inube paris cun sos volontarios, bi accudini malaidos de onzi logu e zente chi trabaallad a su matessi modu de comente bi traballana sos volontarios. S’idea est bistada de Juanne Varrucciu, su maridu de Chiara, ma chie l’had postu in pratiga est Tore Acca, macumeresu, chi dae cando teniad 16 annos (como nde tenede 60), est impinnadu in su volontariadu, diventande amigu mannu de onzi malaidu, fintzas a diventare su presidente de una associassione (s’Oftal de Sardigna), chi onzi annu che lead a Lourdes chentinaias de malaiodos e chi non est frimada mancu in tempus de carestias comente sa pandemia de su Covid.

Tore Acca si c’had postu in conca dae luego, chi tocchiad de faghere carchi cosa pro cussas personas chi vivene in sa sufferenzia e inserrados in istitutos inube non tenene sa possibilidae de viveere una vida prus galana, paris cun amigos. Tore Acca si est postu luego a s’opera ee pianu pianu had cominzadu a regollere adesiones (e fintzas dinari), pro podere fraigare custa istruttura, Villa Chiara, e dare sa possibilidade a tottus sos disabiles de vivere in d’unu centru inube sa caridade ciristiana e s’amicizia benid a su primu postu. Si sunu fattos cuncertos e manifestaziones pro regollere su inari e fintzas pro cussu sunu medas sos artistas chi b’ana aderidu, comente sos Bertas de Tathari, chi han fattu cuncertos gratis pro regollere sos fundos nezzessrios. Non solu sos bertas, ma atteros artistas, gruppos folcloristicos, cantantes, attores e chie had pothidu faghere su possibile, mancari donande sommas de inari.

E gai, in d’unu logu isperdidu de sas campagna de Terranoa, pianu pianu had cominzadu a creschere sa domo, Villa Chiara pro tottus, inube como b’had una vintina de malaidos e disabiles, pris cun d’unu grupu de assistenzia, chi sunu a su matessi tempus volontarios de s’Oftal, chi dedicana su tempus insoro a bistare paris cun cussos chi sunu diventados medas amigos. “Dei appo dadu tottu sa vida mia a sa familla e sos malaiodos- narad Tore Acca- e pro sos sufferentes appo creffidu faghere cust’istruttura inube si respirad forte s’aria de su Vangelu. devo narrere grassias a Nanni Varrucciu, chi pro faghere s’istruttura b’had postu anima e coro. Cherzo narrere grassias a tottu sos volontarios de s’Oftal, ma fintzas a sos amministradores comunales chi bi sun bistados in tottu custos annos, chi hana fattu de tottu pro nos azzuare. devo narrere grassias a tottus sos volntarios de s’Oftal e devo narrere grassias a tottu cussos chi ha semprer dadu una manu de sustegnu, comente carchi imprendodore de Terranoa e comente a sotziedades, cummerciantes, operadores turisticos chi non han dadu una manu pro idere relizzada custa istruttura manna, pro sos sufferentes, pro sos disabiles e pro chie nde tened nezzessidade.

Roberta est una pitzinna de 20 annos chi est istudentessa in s’universidade in continente, mancari issa siad de una idda de sa Sardigna centrale. Roberta cando enid in s’istiu pro sas vacanzas, a pustis de aere saludadu sos suo, leada toora sa valigia e si che trasferiri a Villa Chiara, pro che passare paris cun sos disabiles una paia de meses, in manre volontaria. Paris cun roberta bi est Marta de Oristanis, bi est Luca de Macumere e bi sunu medas pitzinnos dae sos 16 fintzas a sos trint’annos chi dedicana su tempus liberu pro assistere custas personas chi vivene a Villa Chiara. Sunu sos matessi pitzinnos e pitzinnas, chi in su mese de triulas e de capidanni, lassana sos istudios e sas ferias las trascurrene faghinde cussu chi Zesusu had semmpre preigadu: istare paris cun sos sufferentes. paris cun sos malaidos de Villa Chiara c’han passadu duas vacanzas in s’istiu, in su periodu de mesaustu, cando tottus sos atteros fini inserrados pro sa timoria de su Covid. Custos pitzinnos hana isfidau fintzas custu perigulu e paris sun bistados dies cun dies e nottes cun nottes assistinde sos sufferentes de Villa Chiara, chi pustis los hana accumpanzados fintzas a Lourdes.

Cussu chi s’est fattu pro Villa Chiara si chered faghere fintzas in atteros logos de sardigna. Sunu medas sos amministradores comunale de medas biddas e zittades chi sunu andados a biere Villa Chiara e dae inube cheren biere e podede faghere in bidda insoro una istruttura simile. Bi sunu sas ideas, bi est fintzas sa volontade e fortzis meedas resessinidi a faghere una cosa gai otteninde su inari da s’istadu e dae sa regione. Ma non est peroe sa matessi cosa chi s’est fattu pro Villa Chiara. In sa Sardigna centrale si poded faghere in Macumere, a pese de su monte de Sant’Antoni, si poded faghere in Bosa e in pianarza, si poded faghere in Ozzastra, accurzu a su mare, ma fintzas in montagna, si podeed faghere in oristani e in sos centro accurzu ee si poded faghere fintzas in Casteddu. Si poded faghere in tottue, ma siguramente bi chered s’essenzialidade e sa sensibilidade chi had animadu pro faghere Villa Chiara, Nanni Varrucciu e Tore Acca. Su matessi Tore Acca si chered ponnere a disposizione pro faghere in modu chi Villa Chiara non abbarred una cosa isolada, ma pothad diventare su cuminzu de atteras iniziativa, chi pothad tennere su matessi iscopu. E siguramente in d’onzi cosa bi chered sas manos ee s’impinnu de sos giovanos, pitzinnas e pitzinnos cun meda volontade.