di Ivan Marongiu

Tra sas primas 10 universidades giòvanas a su mundu una est italiana

B’at fintzas un’universidade italiana in sa classìfica de sas primas 10 universidades prus giòvanas a su mundu difùndida dae su periòdicu britànnicu Times Higher Education (THE). S’Iscola Superiore Sant’Anna, difatis, est pro ses annos de sighida in sas primas positziones de sa classìfica “Young University Rankings 2021”.

Est gasi a beru, s’Iscola Superiore Sant’Anna de Pisa intrat a fàghere parte fintzas ocannu de sa Top 10 de sas mègius universidades giòvanas de su mundu. S’ateneu, chi est istadu fundadu in su 1987, s’est agiudicadu su de sete postos in sa classìfica globale resurtende fintzas comente sa tertza  Universidade in Europa e sa prima in Itàlia.

Pro compilare custa classìfica su periòdicu THE at analizadu prus de 1500 universidades de 93 natziones de su mundu. Tra sos paràmetros valutados est istadu tentu contu de sa formatzione, de su trasferimentu tecnològicu, de sa chirca (est a nàrrere su nùmeru e sa rilevàntzia de sas publicatziones e su nùmeru de tzitatziones), de sa pertzentuale de istudiantes internatzionales e in fines de sa reputatzione. Est mescamente in sos progetos de chirca chi s’Iscola Sant’Anna de Pisa s’est distinta in mesu a sas àteras, sende chi est resèssida a s’agiudicare bandos importantes siat natzionales siat internatzionales.

Sa classìfica de sas mègius giòvanas universidades a su mundu giùdicat sos ateneos chi tenent prus pagu de chimbanta annos de istòria. A su primu postu s’agatat sa Nanyang Technological University de Singapore, a su segundu sa frantzesa Paris Sciences et Lettres e a su de tres postos s’Hong Kong University of Science and Technology. A su de bator postos b’est sa sudcoreana KAIST, sighida dae sa City University de Hong Kong. A su de ses postos b’est sa Maastricht University (Olanda) mentras a su de sete s’italiana Iscola Superiore Sant’Anna. Serrant sa classìfica de sa Top 10 sa POSTECH (Sud Corea), s’University of Technology Sydney (Austràlia) e s’UNIST (Sud Corea).

Tocat a sutaliniare chi in Itàlia in sos ùrtimos annos maicantos istitutos de formatzione si sunt fatos notare in diversas classìficas de caràtere internatzionale pro s’artu livellu issoro. Pro esèmpiu su Màster of Science in Finance de sa Bocconi est resurtadu tra sos mègius màsters in finàntzia a su mundu. Pro custu no ispantat chi in sa classìfica fata dae su periòdicu THE b’apat fintzas medas àteros ateneos italianos in sas primas 100 positziones. In particulare s’Universidade Vita e Salute San Raffaele de Milanu s’est piatzada a su 30° postu, mentras Roma Tor Vergata a su 68°. S’Universidade de Milanu Bicocca si còllocat 74°, Verona 93° , e Brèscia 96°.

Ma cales sunt sas làureas de seberare pro agatare traballu in Itàlia? Cale cursu de istùdiu universitàriu est mègius seberare pro agatare un’ocupatzione apena acabbados sos istùdios? Su sèberu de su cursu de làurea de printzipiare a s’universidade est unu passu detzisivu in sa vida de un’istudiante. Un’elementu chi podet àere unu ruolu fundamentale in sa detzisione est sa probabilidade de agatare traballu una borta acabada sa carriera universitària.

Sos datos Istat cunfirmant chi  a si laureare pro atzèdere a su mundu de su traballu est unu sèberu cumbeniosu: chie sighit sos istùdios a pustis de àere cunsighidu su diploma in sas iscolas superiores, difatis, agatat prus a sa lestra traballu e balàngiat de prus in cunfrontu a chie si firmat a su diploma ebbia.  Su giornale Repubblica at publicadu unu raportu chi analizat sa situatzione de sas universidades in Itàlia in su 2021 in base a sos datos regortos dae Almalaurea chi at fatu unas cantas indàgines subra sa cunditzione de s’ocupatzione de sos laureados.

Nd’est essida a campu sa classìfica de sas mègius làureas pro agatare traballu in Itàlia. In sa parte prus arta de sa classìfica cun su tassu de ocupatzione prus artu bi sunt sos grupos didàticos  relativos a sas tecnologias noas, a sa comunicatzione e a sos istùdios econòmicos. Sos matessi indiritzos oferint fintzas sos salàrios netos prus artos pro sos laureados.

Sas làureas cun su tassu ocupatzionale prus artu sunt sas de su grupu didàticu Informàtica e Tecnologias ICT chi arribbant  97,2%, segundu sos datos frunidos dae Almalaurea chi at publicadu fintzas sa classìfica de sas làureas chi faghent balangiare de prus in Itàlia. In sa segunda positzione, cun su 96,4% de probabilidade de agatare traballu bi sunt sas làureas in Ingegneria Industriale e de s’informatzione. Su setore Econòmicu òcupat sa de tres positziones de sa classìfica cun unu tassu ocupatzione uguale a su 91,8%. Foras de su pòdiu sas làureas in Architetura e in Ingegneria Tzivile: su tassu de ocupatzione rilevadu est de su 91,6%. In classìfica, in s’òrdine, sighint sos setores Mèigu-Sanitàriu, Sientìficu, Agràriu-Forestale e veterinàriu, Polìticu Sotziale e comunicatzione, Psicològicu, Iscièntzias motòrias e isportivas, Linguìsticu, Educatzione e Formatzione, Giurìdicu e Literàriu Umanìsticu. In fundu a sa graduatòria b’est su setore Arte e Design cun unu tassu de ocupatzione de su 76,6%.

E pro serrare  immoe allegamus de sas làureas chi tocat a seberare si si cheret balangiare de prus in Itàlia. Su Raportu nou subra sa Cunditzione ocupatzionale de sos laureados de AlmaLaurea at iscoviadu sas làureas chi permitent de tènnere un’istipèndiu prus artu in Itàlia. AlmaLaurea, Cunsòrtziu Interuniversitàriu fundadu in su 1994 chi rapresentat 76 Ateneos e belle su 90% de sos laureados essidos cada annu dae su sistema universitàriu italianu, at publicadu s’ùrtimu raportu subra sa cunditzione econòmica de sos istudiantes laureados in Itàlia.

Su Raportu si basat subra un’iscumbata chi pertocat 655 mìgia laureados de 76 Ateneos e analizat sos resurtados otentos in sos mercados de su traballu in Itàlia, in Europa e in su restu de su mundu dae sos laureados  chi sunt istados intervistados dae tres a chimbe annos dae su cunsighimentu de su tìtulu acadèmicu.

In base a sos datos regortos tra sos laureados magistrales biennales intervistados a chimbe annos dae su cunsighimentu de su tìtulu, sa performance mègius interessat sos laureados de sos grupos de Informàtica e tecnologias ICT, Ingegneria industriale e de s’informatzione, econòmicu e sos de su grupu in Architetura e Ingegneria tzivile. Duncas, in base a sos datos de sos laureados magistrales biennales intervistados a chimbe annos de su cunsighimentu de su tìtulu, sa classìfica de sas retributziones mensiles netas pro grupu disciplinare narat chi a su primu postu bi sunt torra sos laureados de su grupu Informàtica e tecnologias ICT cun un’istipèndiu mèdiu de 1.841 èuros a su mese. Sighint su grupu de Ingegneria industriale e de s’informatzione cun 1.837 èuros mensiles e cussu Econòmicu, setore chi bidet duas universidades italianas a su top pro cantu pertocat sos màsters, duos cun 1.644 èuros. Sa de bator positziones pro Architetura e ingegneria tzivile cun 1.587 èuros, mentras a s’ùrtimu postu b’est su grupu Psicològicu cun 1.180 èuros a su mese de mèdia.

Pro su chi interessat sas làureas magistrales a tziclu ùnicu, sos laureados cun sas mègius prospetivas de balàngiu sunt sos de su grupu disciplinare Mèdicu e Farmatzèuticu, acanta sa retributzione mensile est de 1.789 èuros. Segundu e tertzu postu pro sos grupos de Veterinària e Giuisprudèntzia, chi balàngiant 1.625 e 1.477 èuros a su mese de mèdia.