Imprentas 86 del 06.03.2021 Francesco Oggianu
Sa limba sarda est una e unica in tottu su mundu
Abberrere onzi riunione de sos cunsizzos comunales faeddande su sardu, a faghere in d’onzi manera chi sos traballadores de sos comunes si devene impinnare a faeddare iscriere in limba sarda fintzas in sas relaziones cun su pubblicu e cun sos collegas, pubblicare in s’albu pretoriu sad deliberas de sa giunta e de su cunsizzu comunale in sardu e in italianu, sunu sos obiettivos de sa mozione chi est bistada proposta a tottus sos comunes sardos dae Corna de Logu. Est s’assemblea de sos amministradores locales indipendentistas. Una iniziativa chi est bistada lanciada in occasione de sa die internazionale de sa limba mamma, chi dae su 1999, pro volontade de sas Naziones Unidas, benid celebrada si 21 de frearzu, ammentande sos istudentes de s’universidade de Dacca chi su 21 de frearzu de su 1952, snn bistados mortos dae sa polizia pahkistana cando fin pedinde su riconoschimentu de sa limba insoro, su bengalese. Pro favorire s’usu de sa limba sarda, sa Corona de Logu had invitadu a tottus a proporrere una mozione in d’onzi cunsizzu comunale.
Sa mozione est bistada discussa a Arzana, Bauladu, Borore, Gairo, Macumere, Mamoiada, Mogoro, Oristanis, Pabillonis, Pattada, Pirri, Ploaghe, Ruinas, Samugheo, Sant’Anna Arresi, SantAntiogu, Santu Lussurzu, Scanu Montiferru, Serramanna, Serrenti, Silanus, Simala, Simaxis, Terralba, Tula, Ussaramanna e Biddanioaforru. Atteros consizzos comunales custas dies lu sun faghinde e atteros ancora lu deven faghere. Si chered chi sa limba sarda pothad diventare comente s’istalianu, sa limba prusu importante pro sos sardos, cunsideradu unu bene sotziale materiale de valorizzare e tutelare in d’onzi manera. In tottus sos comunes chi est bistada approvada sa moziones, sos cunsizzos comunales hana nadu chi sa liba si deved faeddare i iscriere in cunsizzu comunale, in sas riunione de sa giunta, in sos uffissios e chircare de la podere inserire comente materia in sas iscolas. Tottus hana nadu chi si deve torrare a istituire s’uffissiu de sa limba sarda in d’onzi comune, chi pothad funzionare bene e faghere in modu chi onzi cosa chi si narad e si iscriede, deved essere fatta in sardu e in italianu.
Dae su 20 de frearzuin sas riuniones de su cunsizzu comunale de Macumere, in sos uffissios e fintzas in sas compilaziones de sos attos pubblicos, si deve faeddare e iscriere in sardu. In sa riunione de su 19 de frearzu, su cunsizzu comunale had deliberadu e approvadu sa modifica a s’istatutu comunale, chi fid bistadu fattu in su 2009. Su primi a faeddare in sardu, cando sa delibera deviad essere ancora approvada, est bistadu s’assessore a su patrimoniu Mariano Cadoni a faeddare in sardu, nande chi sa limba est una cosa nostra e non nde devimos faghere meeres, faeddandela in tottue, ma puru in municipiu, in sos uffissios pubblicos e in iscola, ca sa liba sarda est una cosa nostra chi deved essere faeddada, iscritta, tutelada ee valorizzada. Cun sa modifica de s’istatutu comunale, Macumere had leadu s’identidade de sos sardos comente bene primariu, duncas parte in tottu de sa Sardigna. Est unu momentu istoricu importante pro sa comunidade nostra- had nadu Gianfranco Congiu, su cunsizzeri chi had propostu sa mozione a sa modifica a s’istatutu comunale. Tottus a sa fine han bariadu sas manos pro approvaree sa modifica a s’istatutu.
Custa est sa delibera chi had propostu Congiu pro sa tutela e sa valorizzazione de sa limba sarda, approvada con tottus sas manoz arziadas in artu dae tottus sos cunsizzeris comunales. Est sa modifica de s’istatutu che dae su 19 prevedidi chi su comune de Macumere ledad in prenu s’identidade de sa limba de su populu sardu comente bene primariu, parte manna de su patrimoniu culturale immateriale de sa Sardigna. Individuada in s’affermazione de sa limba sarda su presuppostu de su progressu personale e sotziale de sa comunidade de riferimentu, prevedidi su formale riconoschimentu de su bilinguismu in sos attos amministrativos; individuad sos istrumentos pro poded usare e allargare in tottue sa limba e sa cultura in sas riuniones de su cunsizzu comunale, cando si faghene sas relaziones cun su pubblicu e tra su personales amministrativu in sas relaziones tra collegas.
Doighi annos faghed s’istautu est bistadu revisionadu dae su cunsizzu comunale de Macumere, ma nissuni had pensadu de inserire cussas normas de principiu chi cunsentini de adottare iniziativas, programmas, progettos de tutela e de valorizzazione de sa limba nostra. Su sindigu Antoni Succu narad chi sa limba de unu populu rappresentad sas raighinas e s’identidadee de su matessi populu. Pro cussu deved esere tutelada e protetta, fintzas in sos attos de sa’amministrassione pubblica e in sos rapportos tra sa matessi amministrassione e sos cittadinos. Sa limba est sa raighina de onzi populu e sa limba sarda est bistada semper bida male dae sos guvernos e partidos politicos de Roma, ma fintzas in su cunsizzu regionale nostru. Assumancu in Macumere si chircad de prenare cussu chi est abbarradu boidu in sos annos, dae cando in tottue est naschida s’esigenzia de faeddare su sardu e lu iscriere fintzas in sas sedes istituzionale e lu imparare in sas iscolas. Carchi orta sun bistados sos matessi politicos sardos a ponnere unu ostaculu e non faghere in modu chi sa liba benzered tutelada e valorizzada, faeddandela e iscrindela.
Iniziativas pro su riconnoschimentu de sa limba sarda sun bistadas leadas in sos annos. Si pensad chi prus de chimbata annos faghed, unu documentu pro andare contra a sa naschida de s’industria chimica de Otzana est bistadu iscrittu in sardu a Nugoro, ma nissunu l’had leadu in cunsiderazione. Cussu documentu fid bistadu iscrittu dae sos dirigentes nugoreso de su partitu sardu de Mario Melis e sardistas de tanto. Atteros documentos in sardu, sun bistados iscrittos in sos annos de sas luttas pro sarvare sa fabbrica de Otzana cando la cherian serrare. Documentos chi narian sa veridade e annunziaiana sos dannos chi s’industria chimica podiad faghere in su territoriu.Documentos che han contadu de sos pisches mortos in su frumene de su Tirsu, in su lagu Omodeo e sas pasturas inniedidas dae sos iscarrigos de sos fumaiolos de sa fabbrica. Cosas chi sun capitadas fintzas cabndo sa fabbrica fid serrande. Est suzzessu una deghina de annos faghed chi unu liquidu nieddu had titintu sas erbeghes chi fin paschinde in sas campagnas de Noragugume.
In su 1978 in Silanus si est formadu unu gruppu de giovanos chi cherina canbiare e faghere faeddare sa limba sarda in tottue e in sas iscolas. Pro cussu bi est bistada una assemblea manna, inube si sun cunfrontados politicos de onzi partidu e ospites duos faeddadores e tuteladores de sa limba sarda, comente sas biadas de su profesore Antonello Satta de Gavoi e de s’iscritore e girnalista Paulu Pillonca. Cussa die est abbarrada istorica pro sa limba sarda, mancari in medas in cussa assemblea han tentadu de narres chi sa linba sarda non si podiad faeddare in sos uffissios e non si podiad faeddare in iscola. Pustis bi sun bistados sos annos chi sos sardistas sunu arrivados a guvernare in sa Regione e carchi cosa had cominzadu a si movere. Ma in prus de chimbanta annos est bistadu fattu meda pagu, ca cando calinccunu chirchiada de fraigare palattos pro sa valorizzazione e sa tutela de sa limba sarda, atteros han fattu de tottu pro che distruere cantu fid bistadu fattu.
Una dimanda chi medas faghene est ccusta: cal’est su sardu chi si deved faeddare e iscriere? Su logudoresu, su campidanesu o atteru? dialettos o limba. A si dimandare si esistidi una liba sarda bera, chered narrere de siì’immaginare s’esistenzia de una limba de sas origines de sos sardos, in d’unu precisu logu geograficu e sotziale, inube peroe si faeddan medas limbas. Subra de su pianu tecnicu non esistini limbas diversas de su sardu. Esistid unu solu sistema limbisticu sardu e bastad. Bi est su sardu logudoresu, bi est su sardu campidanesu, bi est su sardu barbaricinu, bi est su sardu cadduresu e de salighera. Bi est puru su sardu carlofortinu e atteros mods de faeddare. Ma est sempre su sardu. Sa limba sarda, cussa chi in tottue han semper faeddadu in sas famillas, sos pastores. Si podee narre chi su sardu si distingued dae una variedade de dialettos chi nissunu peroe rappresentad sa limba originaria. Est unu sistema de faeddos e de faeddare diffusos, chi est distribuidu in tottu su territoriu de s’isula nostra. Sa nostra est duncas una limba e onzunu la faeddad a modu sou.